Qobustan rayonunun Poladlı kənd tam orta məktəbində təhsil sahəsində yaranmış ciddi narazılıqlar gündəmdən düşmür. Valideynlər və kənd ictimaiyyəti məktəbdə baş verən özbaşınalıqlara, xüsusilə də rəhbərliyin laqeydliyinə etiraz edirlər.

Bakunews.az-a daxil olan məlumatlara əsasən, məktəbdə dərs saatlarının qanunsuz şəkildə satılması ilə bağlı ciddi iddialar var. Müəllimlər arasında dərs yükünün pulla bölüşdürülməsi halları müşahidə olunur. Bu isə həm pedaqoji kollektivin iş mühitinə, həm də tədrisin keyfiyyətinə mənfi təsir göstərir. Məktəbin direktoru Vüsal İsmayılovun bu proseslərə qarşı heç bir tədbir görməməsi vəziyyətin daha da dərinləşdiyini göstərir.

2025-ci il aprelin 23-də Qobustan Rayon İcra Hakimiyyətinin başçısı Adil Məmmədovun kənd sakinləri ilə keçirdiyi görüşdə bu məsələlər açıq şəkildə gündəmə gətirilib. Görüşdə iştirak edən rayon Təhsil Sektorunun müdiri Tahir Səbzəliyev direktor Vüsal İsmayılovu sərt şəkildə tənqid edib və tapşırıqlar verib. Lakin indiyə qədər verilən tapşırıqların icra olunmaması və heç bir real addımın atılmaması, kənd ictimaiyyətində dərin narazılıq doğurmağa davam edir.

Məsələ ilə bağlı Təhsil Nazirliyi və digər aidiyyəti qurumlar dərhal araşdırmalara başlamalı, qanunsuzluqlara yol verən şəxslərlə bağlı ciddi ölçülər götürülməlidir. Təhsilin keyfiyyəti və şagirdlərin gələcəyi yalnız şəffaf, ədalətli və məsuliyyətli idarəetmə ilə təmin oluna bilər.

Bakunews.az məsələni diqqətdə saxlayacaq və hər hansı yeni inkişaf olacağı təqdirdə oxucularına çatdıracaq.