Bosniya və Herseqovinanın paytaxtı Sarayevoda keçirilən Veteranlar arasında Cüdo üzrə Dünya Çempionatında Azərbaycanı təmsil edən Coşqun Abdullayev uğurlu nəticəyə imza atıb.

M1 – 30–34 yaş kateqoriyasında, 90 kiloqram çəki dərəcəsində tatamiyə çıxan Şabran təmsilçisi dünya çempionatının bürünc medalını qazanıb.

Coşqun Abdullayev BNTV.az-a müsahibəsində qazandığı uğurdan, qarşıdakı hədəflərindən, atasının onun idman həyatındakı rolundan, regionlarda cüdonun inkişafından və gənclərə tövsiyələrindən danışıb.

Cüdoçu əldə etdiyi medalı şəhidlərimizə və onların valideynlərinə həsr etdiyini bildirib:

“Bu qələbə münasibətilə üzərimdə böyük əməyi və zəhməti olan Əməkdar məşqçi, atam Asif Abdullayevə dərin təşəkkürümü bildirirəm. Bu qələbəmi bütün şəhidlərimizə, şəhid ana və atalarına, şəhid valideynlərinə həsr edirəm”.

Jurnalist: Bürünc medal sizin üçün nə ifadə edir?

Coşqun Abdullayev: Bu bürünc medal həyatımda qazandığım ən böyük nailiyyətlərdən biridir. Yeniyetmə, gənclər və böyüklər arasında milli komandanın tərkibində çoxsaylı yarışlarda iştirak etmişəm, Avropa kuboklarında və müxtəlif beynəlxalq turnirlərdə medallar qazanmışam. Amma dünya çempionatında qazandığım bu medal mənim üçün xüsusi əhəmiyyət daşıyır.

Jurnalist: Növbəti hədəfiniz nədir?

Coşqun Abdullayev: Növbəti hədəfim, inşallah, gələn il bu bürünc medalı qızıl medala çevirməkdir. Qarşıma bu məqsədi qoymuşam.

Jurnalist: Həm müəllim kimi çalışmaq, həm də peşəkar idmanla məşğul olmaq çətin deyil?

Coşqun Abdullayev: Xeyr, əksinə, bu mənim üçün əlavə stimuldur. Tələbələrim üçün də motivasiyadır. Həm onları yarışlara hazırlamaq, həm də özüm məşq edib yarışlarda iştirak etmək mənə güc verir.

Gənclərə də demək istəyirəm ki, pis vərdişlərdən uzaq dursunlar, idmanla məşğul olsunlar. Peşəkar idmançılarımıza isə əsas tövsiyəm budur ki, qarşılarına məqsəd qoysunlar və həmin məqsəd uğrunda mübarizə aparsınlar. Əzm göstərən insan gec-tez nəticə əldə edir.

Uşaqlıqdan idmana böyük həvəsim olub. 2008-ci ildə Elnur Məmmədli Pekin Olimpiadasında çempion olduqdan sonra cüdoya marağım daha da artdı. O zaman qarşıma məqsəd qoydum ki, mən də bu idman növündə müəyyən uğurlara imza atacağam.

Jurnalist: Regionda cüdonun əsasını qoyan şəxslərdən biri atanız Asif Abdullayevdir. Siz də onun tələbəsi olmusunuz?

Coşqun Abdullayev: Bəli. Bu gün qazandığım nailiyyətlərdə Asif müəllimin əməyi danılmazdır. Mən nə əldə etmişəmsə, onun böyük zəhməti var.

Bosniyaya yola düşəndə özümə söz vermişdim ki, medal qazanacağam və hava limanında həmin medalı öz əllərimlə atamın boynundan asacağam. Bu mənim üçün ayrıca bir məqsəd idi.

Daha sonra BNTV.az-ın əməkdaşı Əməkdar məşqçi Asif Abdullayevə suallar ünvanlayıb.

Jurnalist: Asif müəllim, cüdo idman növü və Coşqun Abdullayevin qazandığı nəticə haqqında nə deyə bilərsiniz?

Asif Abdullayev: Cüdo sözünün mənasında da incəlik, yumşaqlıq var. Cüdo əslində bir həyat yoludur. Coşqunun keçdiyi yol da bunu göstərir.

Onun dünya çempionatında qazandığı medal regionlarda məşq edən hər bir idmançı üçün örnəkdir. Bu nəticə göstərir ki, regionda məşq etməklə də dünya səviyyəli yarışlarda uğur əldə etmək mümkündür.

Regionlarımızda idman inkişaf edir, idmana diqqət göstərilir. Coşqunun nəticəsi də bunun nümunələrindən biridir.

Veteranlar arasında keçirilən yarışlar onu da göstərir ki, cüdo uzunmüddətli idman növüdür. Bəzi idman sahələrində müəyyən yaşdan sonra peşəkar fəaliyyət məhdudlaşa bilər. Cüdoda isə idmançı böyük yaş qruplarında da yarışmağa və uğur qazanmağa davam edə bilir.

Gənclik dövründə müəyyən uğursuzluqların olması mümkündür. Əsas məsələ yarı yolda dayanmamaq, qarşıya qoyulan məqsədə doğru getməkdir.

Cüdo həm də sağlam həyat tərzinin təbliğidir. Xüsusilə gənclərin sağlam böyüməsinə, zərərli vərdişlərdən uzaqlaşmasına və idmana marağının artmasına böyük töhfə verir.

Jurnalist: Şabranda cüdonun gələcək inkişafı ilə bağlı hansı planlarınız var?

Asif Abdullayev: Şabran rayonunda Azərbaycan Cüdo Federasiyası tərəfindən müasir standartlara uyğun böyük təlim mərkəzi tikilib və istifadəyə verilib. Artıq bir ildir həmin mərkəz fəaliyyət göstərir.

Regionlarda idmanın inkişafı üçün ilk növbədə maddi-texniki baza və peşəkar kadrlar olmalıdır. Şabranda bu gün həm baza, həm də potensial var.

Coşqun müəllim artıq Veteranlar arasında Dünya Çempionatının bürünc medalçısıdır. O, Şabran üçün yetişmiş və kifayət qədər təcrübə toplamış peşəkar kadrdır. Bundan sonra cüdoya gələcək uşaqların hazırlanmasında onun təcrübəsi mühüm rol oynayacaq.

Valideynlər də əmin ola bilərlər ki, Şabran cüdosu etibarlı əllərdədir. Burada uşaqlara yüksək səviyyədə məşq keçə biləcək peşəkar mütəxəssislər var.

Jurnalist: Rayon rəhbərliyinin Coşqun Abdullayevin dünya çempionatına qatılmasında dəstəyi olubmu?

Asif Abdullayev: Açıq demək lazımdır ki, veteran idmançıların beynəlxalq yarışlarda iştirak etmələri üçün müəyyən maliyyə dəstəyinə ehtiyac yaranır. Bakıda müxtəlif idman klubları və cəmiyyətləri öz idmançılarına bu istiqamətdə dəstək göstərirlər.

Coşqun da Şabran idmançısı kimi həm rayonun, həm də Azərbaycanın adını beynəlxalq arenada təmsil edib.

Rayon rəhbərliyi onun yarışa getməsi və hazırlığı ilə bağlı müəyyən maliyyə dəstəyi göstərib. Buna görə rayon rəhbərliyinə təşəkkürümüzü bildiririk. Göstərilən kömək bizim üçün dəyərlidir.