"Qarayev Residence" kimi tanınan "Kursus-Nizami" MTK-nın Bakı Şəhər İcra Hakimiyyətinin sərəncamı əsasında sökdüyü Nizami rayonu, Kamil Balakişiyev küçəsindəki 41 və 43 nömrəli binaların sakinləri ilə məhkəmə çəkişməsi davam edir.

Bina sakinlərinin Pravda.az-a ünvanladıqları şikayətdə bildirilib ki, onların evlərdən çıxarılması MTK-nın öz qərarı üzrə aparılır, məhkəmənin belə bir qərarı yoxdur:

“Şirkətlə heç bir müqavilə bağlamamışıq. Kirayə haqqımızı da ödəmirlər. Hazırda məhkəmə prosesi davam edir. Evlərimizi yıxırlar. Əşyalarımız yararsız hala salıblar. Məhkəmə qərarı budur ki, şirkət bərpa və geridönüş etməlidir. Amma heç bir qərarı yerinə yetirmirlər. İnsanların evini yıxıblar, suyunu, işığını, qazını kəsiblər, üstəlik qapısız, pəncərəsiz evdə onlara yer vermək istəyirlər. "Kursus-Nizami" MTK bildirir ki, bina tikəndən sonra sizə ev verəcəyəm. Seçim olmalıdır, ya pulu onlardan almalıyıq, ya bizə ev alıb verməlidirlər, ya da gözləməliyik. Biz onlara güvənmirik. Bizim kimi nə qədər sakinin illərdir ki, işi məhkəmələrdədir. Məhkəmənin geridönüş qərarını icra etməyənlər sabah bizə ev verəcəklər? Sakinlərdən neçəsi bu məsələyə görə stress keçirib, infarktdan ölüb. Ümumilikdə, 10 nəfər narazıdır. Qalanlar isə təzyiq yolu ilə razılaşıblar. Evlərimiz tam təmirli evlər idi. İki dəfə zəlzələ gördük, binamıza heç bir zərər dəymədi”.

Sakinlərin sözlərinə görə, bu işləri görənlər "Sədərək Ticarət Mərkəzi"nin sahibi Yusif Qədimbəylinin (Sədərək Yusif) işçiləridir: “Sədərək Yusifin qardaşı Ənvərin övladları da oradadırlar. Hamısı bizimlə əlaqə yaradıblar, danışıqlar aparmışıq. Deyirlər ki, pulumuz yoxdur. Pul vermək istəmirlər. Pulunuz yoxdursa, niyə bina tikirsiniz? Bizi ev-eşiyimizdən ediblər. Bütün orqanlara yazmışıq, məktubların cavabını Nizami Rayon İcra Hakimiyyətində gizlədirlər. Bu işin arxasında Yusif Qədimbəyli, Ənvər Qədimbəyli, Fərid Qədimbəyli dayanır. İşi görənlər isə Yusif Qədimbəylinin işçiləri Anar Süleymanov, Ümidvar İbrahimov, Orxan Həsənov, Etibar Namazov, Nəriman Namazovdur”.

Qeyd: “Kursus” adlı bir neçə şirkət var, məlumatları təqdim edirik:

“Kursus-Nizami” MTK – nizamnamə kapitalı 100 AZN, hüquqi ünvanı Yasamal rayonu, İnşaatçılar prospekti ev 33A, mənzil 48, qanuni təmsilçisi Elnur Cəlal oğlu Hüseynovdur.

“Kursus-Nizami-A” MTK qanuni təmsilçisi Məhəmməd Sahib oğlu Zeynallıdır. Digər məlumatlar eynidir.

“Kursus-Nizami-F” MTK – nizamnamə kapitalı 100 AZN, hüquq ünvanı Nərimanov rayonu, Abbasqulu Ağa Bakıxanov, ev məhəllə 758-759, mənzil 49, qanuni təmsilçisi Fərid Ənvər oğlu Qədimovdur.

“Kursus-Nəsimi” MTK nizamnamə kapitalı 100 AZN, hüquqi ünvanı Yasamal rayonu, İnşaatçılar prospekti ev 33A, mənzil 47, qanuni təmsilçi Yelena Alekseyevna İbrahimovadır.

Qarşı tərəfin də mövqeyini dərc etməyə hazırıq.