Bakının Yasamal rayonu ərazisində fəaliyyət göstərən “Doktor Davud” klinikası ətrafında yayılan məlumatlar son günlər ictimai müzakirələrin əsas mövzularından birinə çevrilib. Məsələ təkcə bir tibb müəssisəsinin fəaliyyəti ilə məhdudlaşmır, ümumilikdə səhiyyə sistemində nəzarət, peşəkarlıq və məsuliyyət məsələlərini yenidən gündəmə gətirir.

Bakunews.az-ın əldə etdiyi məlumatlara görə, aparılan yoxlamalar zamanı klinikanın fəaliyyətində bir sıra ciddi nöqsanların olduğu iddia edilir. Bildirilir ki, müəssisədə həm kadr təminatı, həm də təşkilati iş prinsipləri mövcud qanunvericiliyin tələblərinə tam uyğun deyil.

İddialar arasında ən diqqətçəkən məqamlardan biri isə həkim Davud Qüdrətovun ixtisasından kənar tibbi xidmət göstərməsi ilə bağlıdır. Məlumata görə, ixtisasca pediatr olan həkim pasiyentlərə qastroenteroloji xidmətlər təqdim edib. Bu hal isə qüvvədə olan qaydalar baxımından ciddi pozuntu kimi qiymətləndirilir.

Qeyd edək ki, Azərbaycan qanunvericiliyinə əsasən, həkim yalnız sertifikasiya olunduğu ixtisas üzrə fəaliyyət göstərə bilər. İxtisasdan kənar tibbi müdaxilə isə qanunsuz fəaliyyət sayılır və bu, hüquqi məsuliyyət yaradır. Bu baxımdan ortaya çıxan iddialar həm hüquqi, həm də etik müstəvidə araşdırılmalı məsələlər kimi qiymətləndirilir.

Bununla yanaşı, klinikada müxtəlif tibbi sahələr üzrə xidmətlərin göstərildiyi bildirilsə də, yoxlamalar zamanı həmin sahələr üzrə ixtisaslaşmış mütəxəssislərin mövcud olmadığı da iddialar sırasındadır. Bu isə pasiyentlərin sağlamlığı üçün potensial risk faktorlarını artırır.

Mövcud vəziyyət bir sıra vacib sualları aktuallaşdırır: Pasiyentlərə göstərilən xidmətlər hansı hüquqi əsaslarla həyata keçirilib? İxtisas uyğunluğu olmadan diaqnoz və müalicə prosedurlarının aparılması nə dərəcədə doğrudur? Bu proseslərə hansı qurumlar tərəfindən nəzarət olunub?

Diqqətçəkən digər məqam isə odur ki, məsələ ilə bağlı verilən rəsmi açıqlamalarda klinikanın ümumi fəaliyyəti izah olunsa da, konkret olaraq ixtisasdan kənar tibbi xidmətlərlə bağlı iddialara aydın və birbaşa münasibət bildirilməyib.

Hazırda məsələ ilə bağlı araşdırmaların davam etdiyi qeyd olunur. Aidiyyəti qurumların yekun mövqeyi və hüquqi qiymətləndirməsi ictimaiyyət tərəfindən gözlənilir.

Bakunews.az olaraq bildiririk ki, qarşı tərəfin mövqeyini dərc etməyə hazırıq və cavab haqqını tanıyırıq.