2021-ci il noyabrın 9-da Bakının Nizami rayonu Qara Qarayev prospektində 1991-ci il təvəllüdlü Natiq Ramazanov bıçaqlanır. Dərhal hadisə ilə bağlı polis və prokurorluq əməkdaşları əraziyə yollanır.

3 saylı Şəhər Kliniki Xəstəxanasına aparılan Ramazanov yolda keçinir. Onun meyiti elə xəstəxananın həyətində, Təcili Tibbi Yardım avtomobilində aşkar edilir.

Həmin gün 25-ci Polis Şöbəsinin əməkdaşları tərəfindən şübhəli şəxs qismində Əli Musayev saxlanılıb. Anket məlumatlarına əsasən, Musayev 1982-ci ildə Ağdam rayonunda anadan olub, əvvəllər məhkum olunmayıb.

Faktla bağlı Nizami rayon prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma, ehtiyatsızlıqdan zərərçəkmişin ölümünə səbəb olduqda) maddəsi ilə cinayət işi başlanılıb.

Lent.az qətl hadisəsinin istintaq materiallarını əldə edib.

İstintaqla müəyyən edilib ki, noyabrın 8-də Natiq Ramazanov “TikTok” sosial şəbəkəsində Əli Musayevin ünvanına nalayiq sözlər yazıb. Buna görə, ayın 9-da Əli zəng edib, Ramazanovla danışarkən, işlətdiyi söyüşlərə aydınlıq gətirmək üçün, onu görüşə çağırıb. Saat 16:30-da onlar Qara Qarayev prospekti, 31 ünvanında yerləşən özəl klinikanın qarşısında görüşərək, 37 nömrəli binaya doğru hərəkət ediblər. Həyətdə söhbət edərkən Əli Musayev Natiq Ramazanovdan sosial şəbəkədə, habelə zəngləşərkən işlətdiyi və yazdığı nalayiq ifadələrə görə ondan üzr istəməsini tələb edib. Ramazanov bundan imtina etdikdə, aralarında baş vermiş mübahisə zamanı Musayev bıçaqla onun sağ buduna xəsarət yetirib.

İş üzrə dindirilmiş Əli Musayev bildirib ki, ailəlidir, himayəsində 15 və 10 yaşlı övladları var. 1-ci qrup əlil olduğu üçün səhhəti ilə əlaqədar işləməyib:

Əli Musayev

“Noyabrın 8-i səhər saat 5 radələrində özümə məxsus telefonda "TikTok" şəbəkəsinə daxil olduqda, tanımadığım şəxs tərəfindən açılmış “canlı”ya baxırdım. Məndən sonra daxil olan Natiq Ramazanov şəxsi profilindən “özünüzə hörmət edin” deyə ismarıc yazdı. Həmin ismarıc bütün istifadəçilərə ünvanlanmışdı. Bunu təhqir kimi qəbul edərək, öz profilimdən “camaata hörmət dərsi keçənin burda nə işi var, get hörməti anandan öyrən” sözlərindən ibarət ismarıc yazdım. İsmarıcımı “canlı”da olan bütün şəxslər görüblər. Bundan sonra Natiq nömrəsini qeyd edib, söyüşlə ona yığmağımı tələb etdi. Dərhal qeyd olunan nömrəyə zəng etdim. Telefonu götürən şəxs məni təhqir etməyə başladı. Natiqə “söydüyü söyüşlərə görə dilini kəsəcəyimi” deyəndə, o, gəlib məni tapacağını və ailəmin qabağında məni cəzalandıracağını bildirdi. Natiqdən üzr istəməyini, istəməyəcəyi təqdirdə isə onu bıçaqla vuracağımı dedim.

Cavab olaraq Ramazanov yenə nalayiq ifadələr yazaraq, nömrəmi blok etdi. Ayın 9-u saat 17 radələrində Natiqə zəng edib, görüşmək istədiyimi söyləyəndə, o, istədiyim yerə gələ biləcəyini dedi. Onun təklifi ilə Qara Qarayev prospektində yerləşən klinikanın qarşısında görüşdük və söhbət etmək üçün 37 nömrəli binanın həyətinə gəldik. Yol boyu üzr istəməyi təklif etsəm də, Natiq bundan imtina etdi. Daha sonra həyətdə oturaraq, söhbət etməyə başladıq. Natiqə ikimizin də əsəbləşdiyimizi söyləyərək, bu söhbəti bağlamağı təklif etdim. Buna baxmayaraq Natiq yenə “üzr istəməyəcəyini” vurğuladı.
Əsəbiləşərək, onu cəzalandırmaq qərarına gəldim. Bıçaqla Natiqin sağ buduna bir zərbə vurdum. Bu zaman tanımadığım şəxs arxa tərəfdən bıçağı əlimdən aldı. Səs-küyə hadisə yerinə toplaşan insanlardan çoxlu qan itirməməsi üçün bel kəməri ilə Natiqin yarasını sıxmalarını xahiş etdim. Daha sonra yaşadığım evə gedərək, paltarlarımı dəyişdim. Məqsədim 25-ci Polis Şöbəsinə gedib təslim olmaq idi. Amma, evdən çıxanda binanın həyətində polis əməkdaşlarını gördüm. Şöbədə hadisəni danışaraq, səhv etdiyimi və əməlimdən peşman olduğumu qeyd etdim”.
Zərərçəkmiş şəxsin hüquqi varisi Akif Ramazanov ifadəsində göstərib ki, oğlu Natiq 2020-ci ildə leytenant rütbəsində olmaqla 2-ci Qarabağ müharibəsində döyüşlərdə iştirak edib:

“Özəl şirkətdə mühəndis vəzifəsində çalışırdı. Sakit təbiətli insan idi. 2021-ci il noyabrın 9-da evdə olanda övladımın morqda olması barədə məlumat aldım. Ora çatanda mənə Natiqin ölməsi məlum oldu. İstintaq zamanı bildim ki, aralarında baş vermiş mübahisə zamanı oğlumu bıçaq zərbəsi ilə Əli Musayev qətlə yetirib”.

Şahid Rövşən Məmmədov bildirib ki, Əli Musayev qonşusu olub. Ara-sıra məhəllədə görüşüblər, ibadət edən Əli daim onunla və digər tanışları ilə ibrətamiz söhbətlər edib:

“Noyabrın 8-də qonşum mənə göndərdiyi ismarıcda bir nəfərin internetdə ağır söyüşlər söydüyünü və onu söhbət etmək üçün Xırdalana çağırdığını bildirdi. Cavab olaraq Əliyə internetdə belə şeylərin tez-tez baş verdiyini, tərbiyəsiz adamların çox olmasını, buna görə də heç nəyə fikir vermək lazım olmamasını dedim. Bir neçə saatdan sonra görüşəndə, Əli yenə həmin söhbəti danışdı. Dedi ki, Natiq adlı şəxs mübahisəni həll etmək üçün Xırdalana getməyini istəyir. Əliyə qəti surətdə getməməyini bildirdim. Mənimlə razılaşan qonşum söz verdi ki, bir daha bu məsələyə qayıtmayacaq. Ayın 9-da həmişəki kimi idman etməkdən ötrü tanışım Hüseyn Şükürlü ilə Qara Qarayev prospekti, 37 ünvanına yollandıq. 1-ci qrup əlil olduğumdan ara-sıra əyləşdiyim əlil arabasından qalxaraq, idman alətlərindən tutub dartınma hərəkətləri edirdim. Həmin vaxt Əlinin tanımadığımız bir nəfərlə həyətə gəlib, söhbətgahda əyləşdiklərini gördük. Qonşum aralarında yaranmış mübahisəyə görə Natiq Ramazanovdan qarşılıqlı olaraq üzr istəməsini tələb etsə də, o, bundan imtina edirdi. Növbəti dəfə onlara tərəf baxanda, Əli ilə Natiqin ayağa qalxıb, bir-birinin yaxasından tutduqlarını gördük. Davanın qarşısını almaq üçün Hüseyn yaxınlaşmaq istəsə də, Əli yaxın gəlməməsini dedi. Bir neçə saniyədən sonra Natiqin paltarlarının qana bulaşdığını görüb Əlinin onu bıçaqla vurduğunu başa düşdük.

Hadisə yerinə xeyli adam toplaşmışdı. Həmin məhəllədə yaşayan Nadir adlı şəxs şalvarının bel kəmərini çıxararaq, çoxlu qan itirməməsi üçün Natiqin ayağına bağladı. Bizim kimi həyətdə idman edən Məhəmməd adlı oğlan təcili tibbi yardıma zəng edib, həmin ünvana gəlməklərini bildirdi. Hadisə yerinə gələn polis əməkdaşlarına dedim ki, cinayəti qonşum törədib və paltarlarını dəyişəndən sonra gəlib təslim olacaq. Təcili yardım briqadası həmin oğlanı xəstəxanaya apardı”.

Mobil telefonlara baxış keçirilərkən, Əli Musayevin istifadəsində olan telefon nömrəsi ilə Natiq Ramazanova məxsus telefon nömrəsi ilə noyabrın 8-i saat 05:53-də, 06:01-də, 06:20-də, noyabrın 9-u saat 14:32-də, 16:05-də, 16:15-də və 16:17-də danışıqlar aparılması müəyyən edilib.

Məhkəmə iclasında Əli Musayev ittiham üzrə özünü təqsirli bilib və mərhumun atasından üzr istəyib. Zərərçəkmiş şəxsin hüquqi varisi təqsirləndirilən şəxsdən şikayətçi olduğunu bildirib. Dövlət ittihamçısı Əli Musayevin 11 il müddətinə azadlıqdan məhrum edilməsini istəyib.

Məhkəmə nəticəyə gəlib ki, ibtidai istintaq orqanı tərəfindən Əli Musayevin əməli Cinayət Məcəlləsinin 126.3-cü maddəsi ilə düzgün tövsif olunub. O, həmin maddə ilə təqsirli bilinərək, cəzalandırılmalıdır.

Bakı Ağır Cinayətlər Məhkəməsinin hökmü ilə cəzasını ümumi rejimli cəzaçəkmə müəssisəsində çəkməklə Əli Musayev 9 il müddətinə azadlıqdan məhrum olunub.

BakuNews.Az