Yeniyetmə idmançı Omar Borcəli 19-cu Respublika Kikboksinq Çempionatında qalib oldu
Azərbaycanda idmanın inkişafı dövlət səviyyəsində prioritet sahələrdən biri olaraq qalır. Bunun bariz nümunəsi olaraq, ölkə daxilində keçirilən müxtəlif idman yarışlarında gənc idmançılarımızın qazandığı uğurlar qeyd olunmalıdır. Bu qəbildən olan yarışlardan biri – Kikboksinq üzrə narkomaniya və uşaq cinayətkarlığına qarşı 19-cu Respublika Çempionatı və birinciliyi də növbəti dəfə istedadlı gənclərin səhnəyə çıxmasına imkan yaradıb.
Yeniyetmə idmançı Omar Borcəli bu yarışda fərqlənərək qaliblər sırasında yer alıb. O, qələbəsini Vətən Müharibəsi şəhidi, Daxili Qoşunların xüsusi təyinatlı əməkdaşı Türkay Həsənlinin xatirəsinə həsr edib və onun döyüş yolunu özü üçün örnək olaraq gördüyünü bildirib.
Omar Borcəli qazandığı uğur münasibətilə ölkə rəhbərliyinə – Prezident İlham Əliyevə, Birinci vitse-prezident Mehriban Əliyevaya, DİN rəhbərliyi və Daxili Qoşunların komandanlığına, eləcə də yarışın təşkilində əməyi olan Azərbaycan Kikboksinq Federasiyasına öz təşəkkürünü çatdırıb.
İdmançı eyni zamanda Elm və Təhsil Nazirliyinə, Gənclər və İdman Nazirliyinə, Suraxanı rayon Gənclər və İdman İdarəsinin rəisi Amil Ağayevə, təhsil aldığı S.S.Axundov adına 172 saylı məktəbin direktoru Vəfa Bağırovaya və müəllimi Şəhanə Rüstəmovaya da minnətdarlıq edib:
“Bu günkü uğurlarımda ailəmin dəstəyi, müəllimlərimin diqqəti və təlimçilərimin zəhməti böyük rol oynayıb. Hər kəsə təşəkkür edirəm,” – deyə O.Borcəli vurğulayıb.
Qeyd edək ki, Omar Borcəli “Dəmir Yumruq” İdman Klubu, WAKO, XTQ İdman Mərkəzi, DİN DQ XTQ, və digər təşkilatların dəstəyi ilə təlimlərini davam etdirir və ölkəmizi gələcək beynəlxalq yarışlarda da təmsil etməyi qarşısına məqsəd qoyub.
Əlaqə whatsapp:+994 70 402 02 85
BakuNews.az
