Bakunews.az xəbər verir ki, 23–26 oktyabr 2025-ci il tarixlərində paytaxtımız Bakı şəhərində idmanın “Budo” döyüş növləri üzrə möhtəşəm Dünya Kuboku turniri keçirilmişdir. Dünyanın müxtəlif ölkələrindən gələn idmançıların iştirakı ilə baş tutan bu nüfuzlu yarış idman ictimaiyyətinin böyük marağına səbəb olub. Yarışda Azərbaycanı uğurla təmsil edən “Zülfüqar” İdman Klubunun gənc və perspektivli idmançısı Həsənzadə Nuray Vüqar qızı möhtəşəm çıxışı ilə tamaşaçıların və hakimlərin böyük rəğbətini qazanıb.

Nuray Həsənzadə yarışda idmanın K-1 versiyası üzrə qüvvəsini sınayaraq, yüksək peşəkarlığı, taktiki hazırlığı və döyüş ruhu ilə seçilib. O, mərhələli şəkildə bütün rəqiblərinə qalib gələrək, finalda da üstün performans nümayiş etdirib və nəticədə Azərbaycan birincisi adına layiq görülüb. Bu uğur ona həm ölkə çempionu titulunu qazandırıb, həm də beynəlxalq arenada Azərbaycan bayrağını qürurla dalğalandırmaq şərəfini yaşadıb.

Nuray Həsənzadənin uğurlu çıxışı təkcə onun fərdi bacarığının deyil, həm də “Zülfüqar” İdman Klubunun peşəkar hazırlıq sisteminin və mükəmməl məşqçilik məktəbinin göstəricisidir. Gənc idmançının fərdi məşqçisi Fərrux Zülfüqarovun peşəkar rəhbərliyi və daim göstərdiyi dəstək bu qələbədə mühüm rol oynayıb. Komandanın sistemli hazırlığı, döyüş taktikasına yanaşma tərzi və yüksək motivasiyası Nurayın beynəlxalq arenada bu səviyyəyə yüksəlməsini təmin edib.

Azərbaycan Budo Döyüş Növləri Federasiyasının rəhbərliyi və əməkdaşları da turnirin yüksək səviyyədə təşkili və gənc idmançıların inkişafına göstərilən diqqətə görə böyük təqdirəlayiq işlər görüb. Federasiyanın məqsədyönlü fəaliyyəti nəticəsində ölkəmizdə Budo və K-1 idman növlərinə maraq ildən-ilə artır, gənclər sağlam həyat tərzinə, intizama və vətənpərvərliyə yönəldilir.

Onu da qeyd etmək lazımdır ki, Nuray Həsənzadə bundan əvvəl də bir sıra beynəlxalq və respublika səviyyəli yarışlarda uğurlar qazanaraq birinci yerlərə layiq görülüb. O, daim səhnəyə çıxarkən Azərbaycan bayrağını qürurla təmsil edir və gənc nəsil üçün əsl nümunə hesab olunur. Nurayın ardıcıl uğurları bir daha sübut edir ki, Azərbaycan qadın idmançıları yalnız zəriflikləri ilə deyil, həm də iradə, mübarizə əzmi və güclü xarakterləri ilə dünyada seçilirlər.

Bu qələbə həm də Azərbaycan idmanının, xüsusən də döyüş növlərinin gələcəyinə inamı artırır. Gənc idmançılar üçün belə uğurlar motivasiya mənbəyidir. “Zülfüqar” İdman Klubunun rəhbərliyi və kollektivi gələcəkdə də bu cür parlaq nəticələr əldə etmək üçün var gücü ilə çalışacaqlar.

Sonda, gənc çempionun fərdi məşqçisi Fərrux Zülfüqarova və onun komandası üzvlərinə, eləcə də Azərbaycan Budo Döyüş Növləri Federasiyasının rəhbərliyinə gənclərin inkişafına verdikləri dəstəyə görə təşəkkür bildirilir. Nuray Həsənzadənin bu möhtəşəm uğuru Azərbaycanın idman tarixində növbəti parlaq səhifə kimi yadda qalacaq.