Keçmiş Azərbaycan Kosiki Karate-do Federasiyasının rəhbəri, 6-cı dan qara kəmər sahibi Rafael Rafiq oğlu Bünyatovun millət vəkili Ülvi Quliyevlə problem yaşadığı iddia olunur.

32gun.az-ın məlumatına görə, Rafael Bünyatovun rəhbərlik etdiyi federasiyanın fəaliyyətinə xitam verilməsində məhz Azərbaycan Karate Federasiyasının prezidenti, deputat Ülvi Quliyevin rol aldığı iddia edilir. İddialara görə, elə bu səbəbdən federasiya Gənclər və İdman Nazirliyi tərəfindən akkreditasiyadan çıxarılıb və yalnız ictimai birlik kimi fəaliyyətini davam etdirə bilir.
İddialara gorə, tərəflər arasında münasibətlər o qədər gərginləşib ki, Rafael Bünyatov bir çox tədbirlərdə iştirakdan belə imtina edir. Onun illərdir inkişaf etdirdiyi Kosiki Karate-do Federasiyasından federasiya statusunun alınması, birbaşa deputatın müdaxiləsi ilə əngəlləndiyi də iddialar arasındadır.

32gun.az məsələ ilə bağlı Azərbaycan Karate Federasiyasının prezidenti Ülvi Quliyevin köməkçisi Vüsal Abdullazadə ilə əlaqə saxlayıb.
Vüsal Abdullazadə açıqlamasında bildirib ki, qanunvericiliyə əsasən, bir idman növü üzrə yalnız bir federasiya akkreditasiyadan keçə bilər:
"Rafael müəllim də hazırda Azərbaycan Karate Federasiyasının üzvüdür. Keçmişdə onun rəhbərlik etdiyi federasiya da Nazirlik tərəfindən akkreditasiyadan keçmişdi. Amma bu gün yalnız bizim federasiya rəsmi olaraq fəaliyyət göstərir. Digərləri isə sadəcə ictimai birlik kimi mövcuddur."
Abdullazadə qeyd edib ki, Rafael Bünyatovun rəhbərlik etdiyi qurum Ədliyyə Nazirliyində qeydiyyatdan keçmiş ictimai birlik olsa da, federasiya statusu yoxdur:
"İdman haqqında qanunun tələbinə görə federasiya statusu yalnız Gənclər və İdman Nazirliyi tərəfindən verilir. Rafael müəllimin rəhbərlik etdiyi istiqamət bizim federasiyanın daxilində üslub olaraq fəaliyyət göstərir. O, həm də federasiyanın idarə heyətinin üzvüdür."
V.Abdullazadə əlavə edib ki, Rafael Bünyatovun iştirakı ilə keçirilən tədbirlər olur və onun federasiyada mövqeyi hələ də qalır:
"O, bizim idarə heyətinin üzvüdür və söz sahibidir. Onun nümayəndəsi olduğu üslub da digər tanınmış karate istiqamətləri kimi fəaliyyət göstərməkdə davam edir."
Xatırlatma: Rafael Bünyatov kimdir?
Rafael Bünyatov tanınmış idmançı ailəsində dünyaya gəlib. Onun atası, əslən Əmircandan olan Rafiq Vəliyulla oğlu Bünyatov (1951–2008) yüngül atletika üzrə beynəlxalq dərəcəli idman ustası və Azərbaycan rekordçusu olub.
Rafael Bünyatov hazırda Azerbaijan Sport Talents Academy (ASTA) adlı qurumun prezidentidir. O, karate sahəsində uzun illər fəaliyyət göstərib, müxtəlif beynəlxalq layihələrə imza atıb və Kosiki Karate üslubunun Azərbaycanda inkişafında mühüm rol oynayıb.

32gun.az