Fövqəladə hallar naziri, general-polkovnik Kəmaləddin Heydərovun fəxri fərman və fərqlənmə diplomları ilə təltif etdiyi sabiq rəis qanunsuz olaraq işdən çıxarıldığını iddia edib.

Qaynarinfo-nun məlumatına görə, FHN-nin Maddi-Texniki Təchizat İdarəsinin ümumi şöbəsinin sabiq rəisi Faiq Ağalarov özü və idarənin xeyli sayda əməkdaşının aladadılaraq işdən çıxarıldığını bildirib.

"2009-cu ildən 2023-cü ilin sonlarınadək FHN-nin Maddi-Texniki Təchizat İdarəsində işləyərək əmək fəaliyyəti ilə məşğul olmuşam. 30 iyul 2009-cu ildə İdarənin ümumi şöbəsinin iş icraçısı vəzifəsinə, 2 oktyabr 2013-cü il tarixdə həmin şöbənin mütəxəssisi vəzifəsinə, 23 iyun 2014-cü il tarixdə şöbənin rəisi vəzifəsinə təyin edilmişəm. 30 oktyabr 2023-cü il tarixində FHN-lə bağlanmış əmək müqaviləmə xitam verilib və idarənin ümumi şöbəsinin rəisi vəzifəsindən azad edilmişəm.

Maddi-Texniki Təchizat İdarəsində işlədiyi dövrdə hər hansı bir intizam məsuliyyətinə cəlb edilməmişəm, əksinə dəfələrlə nazir Kəmaləddin Heydərov tərəfindən fəxri fərman və fərqlənmə diplomları ilə təltif olunmuşam. Maddi-Texniki Təchizat İdarəsi nazirliyin tərkibində olsa da, dövlət qulluğuna aid edilməyən mülki bir idarə olub. Artıq bir neçə il idi ki, nazirlik tərəfindən Maddi-Texniki Təchizat İdarəsinin də FHN-nin digər idarə və şöbələri kimi dövlət qulluğuna keçirilməsi üçün lazımi sənədləşdirilmə işləri aparılırdı. Bu sahədə də idarənin ümumi şöbəsinin rəisi kimi fəal iştirak etmiş, tələb olunan sənədlərin hazırlanması prosesinə rəhbərlik etmişəm. 2023-cü ilin oktyabr ayından təmsil etdiyim idarənin əməkdaşları da dövlət qulluqçusu kimi qeydiyyata alınmağa başladı. Dövlət qulluğuna keçmək reallaşdıqdan sonra nazirliyin aidiyyət qurumlarının vəzifəli şəxsləri tapşırdılar ki, idarənin bütün işçiləri öz xahişləri ilə işdən azad edilmə barədə ərizə yazsınlar".

O bildirib ki, həmin vaxt əksər işçilər öz xahişləri ilə işdən azad edilmə barədə ərizə yazmaqdan ehtiyat edib, bu tələbi yerinə yetirməyiblər:

"Belə olan halda, nazirliyin aidiyyəti idarəsinin vəzifəli əməkdaşları idarəyə gələrək, iclas keçirtdilər və bir daha bildirdilər ki, Maddi-Texniki Təchizat İdarəsi nazirliyin digər idarə və şöbələri kimi dövlət qulluğuna keçdiyi üçün idarənin bütün işçiləri öz xahişləri ilə işdən azad edilmə, həmçinin yenidən dövlət qulluğu hesab edilən həmin işə qəbul edilmələri barədə ərizə yazmalıdırlar və nazirin tapşırığı ilə bütün işçilər əvvəlki iş yerləri və vəzifələrində qalaraq, əmək fəaliyyətlərini davam etdirəcəklər və heç kəs işdən kənarlaşdırılmayacaq. Bu iclasın gedişi idarəmizin əməkdaşları tərəfindən səs yazısı formasında qeydə alınıb və həmin səs yazısı da var".

Faiq Ağalarov əlavə edib ki, bundan sonra idarənin bütün əməkdaşları 2023-cü ilin oktyabr ayının sonlarında öz xahişləıri ilə işdən azad edilmək barədə birinci və yenidən həmin işə qəbul edilmə barədə ikinci ərizəni yazaraq, nazirliyin kadrlar şöbəsinə təqdim ediblər:

"Bu əsasla da, idarənin əməkdaşlarının işdən azad edilməsinə və dekabr ayından başlayaraq, təxminən 120 əməkdaşdan əksəriyyəti elə həmin ay, yəni bir neçə gün ərzində yenidən işə qaytarılmasına başlanıldı. Qalan hissəsi isə sonrakı aylarda əvvəlki və ya öz arzuları ilə nazirliyin tərkibində başqa işlə təmin edildilər. Bu proseslər bir neçə ay davam etdiyindən aldadılaraq işdən azad edilən əməkdaşlar nazirliyin yerləşdirməsini gözləyirdilər və vaxtaşırı xatırlatma ərizəsi ilə nazirliyə müraciət edirdilər. Buna baxmayaraq, idarənin bir necə əməkdaşının, o cümlədən ümumi şöbəsinin rəisi kimi mənim FHN-də vəzifəmizə geri qaytarılması təmin edilməyib".

Keçmiş rəis bildirib ki, dəfələrlə ərizə və teleqramlarla nazirliyin rəhbərliyinə müraciət etsələr də, hər qəbulda da işlə təmin ediləcəkləri bildirilsə də, tələbləri icra edilməyib. O, işdən azad edilməsindən bir ilə yaxın bir müddət keçdikdən sonra artıq anlayıb ki, nazirlik onu işlə təmin etmək istəmir. Belə olan halda rəsmi ərizə ilə FHN-nə müraciət edərək, bağlanmış əmək müqaviləsinə xitam verilməsi barədə əmrin surətinin və əmək kitabçasının ona verilməsini tələb edib. 2024-cü ilin noyabr ayının 29-da əmək kitabçası nazirliyin Kadrlar İdarəsi tərəfindən ona qaytarılsa da, iddiaçı ilə bağlanmış əmək müqaviləsinə xitam verilməsi barədə əmrin surətinin verilməsi təmin edilməyib.

Sabiq rəis bu barədə məhkəməyə müraciət edib. Bir neçə gün əvvəl keçirilən prosesdə onun iddiası tələb edilməyib. Səbəb kimi isə işdən çıxarılması ilə bağlı müddətin keçməsi göstərilib.

Qeyd edək ki, FHN-nin Kadr siyasəti Baş İdarəsinin rəisi general Sevda Şirinova və Maddi-Texniki Təchizat İdarəsinin rəisi Elnar İmanovdur.