Quba-Xaçmaz Regional Təhsil İdarəsinin tabeliyində olan Xaçmaz rayon Qımılqışlaq kənd tam orta məktəbində texniki işçi vakansiyası ətrafında baş verənlər “şəhid ailələrinə üstünlük verilir” ifadəsinin reallıqda sadəcə kağız üzərində qaldığını göstərir.

Araşdırmalarımız nəticəsində məlum olub ki, məktəbdə mövcud olan 13 texniki işçi ştatından 1 yer vakant olub. Həmin yerə 1-ci Qarabağ müharibəsi şəhidi Paşayev İlham Hüseyn oğlunun bacısı Tahirova Elminaz Hüseyn qızı müraciət edib.

Şəhid bacısına Quba-Xaçmaz Regional Təhsil İdarəsində vətəndaş qəbulunda bildirilib ki, vakant yer mövcuddur, şəhid ailələrinə üstünlük verilir və onun işə qəbul olunacağı deyilib. Elminaz Tahirova bu vədə inanaraq idarədən yola salınıb.

Lakin eyni dövrdə Regional Təhsil İdarəsində vətəndaş qəbulunda işə qəbul üçün müraciət edən Müslümova Şəfiqə Hürmət qızına tam əks məzmunlu cavab verilib. Ona açıq şəkildə bildirilib ki, həmin yerə şəhid bacısı iddialıdır və bu səbəbdən işə qəbul mümkün deyil. Hətta xüsusi olaraq vurğulanıb ki, “ilk növbədə şəhid ailələrinə üstünlük verilir”.

Əgər üstünlük şəhid ailəsinindirsə, bəs sonra nə baş verdi?

Məlumatlara görə, sonradan Quba-Xaçmaz Regional Təhsil İdarəsinin İnzibati-Təşkilat sektorunun müdiri Fikrət Heybətovla razılığa gələn Müslümova Şəfiqə Hürmət qızı 2026-cı ilin yanvar ayında Qımılqışlaq kənd tam orta məktəbinə xadimə, yəni texniki işçi kimi təyinat alıb. Lakin ərazi bütövlüyü uğrunda canından keçmiş şəhidimizin bacısı kənarda qalıb.

Bu halda artıq bir deyil, bir neçə ciddi sual ortaya çıxır:

Əvvəl şəhid ailəsinə üstünlük verildiyini bildirən Regional Təhsil İdarəsi sonradan bu prinsipi hansı əsasla dəyişib?

Şəhid bacısı vakant yer olduğu halda niyə işlə təmin olunmayıb?

Müslümova Şəfiqə Hürmət qızının işə qəbulunda hansı “razılaşma” həlledici rol oynayıb?

İnzibati-Təşkilat sektorunun müdiri Fikrət Heybətov bu qərarı hansı maraqlara əsaslanaraq verib?

Şəhid ailələrinə verilən “üstünlük” konkret olaraq kimlər üçün və hansı mərhələyədək keçərlidir?

Bakunews.az olaraq hesab edirik ki, bu məsələ təkcə bir iş yeri ilə bağlı deyil. Bu, dövlət strukturlarında şəhid ailələrinə münasibətin real mənzərəsidir. Şəhid adından formal şəkildə istifadə edib, arxa planda başqa maraqlara yol açmaq nə qanuna, nə vicdana, nə də cəmiyyətin gözləntisinə sığır.

Məsələ ilə bağlı Quba-Xaçmaz Regional Təhsil İdarəsindən və Fikrət Heybətovdan ictimaiyyətə açıq, əsaslandırılmış və sənədlərə söykənən izahat gözlənilir.

Şəhidin haqqı “razılaşma masasında” itirilməməlidir.

Bakunews.az mövzunu diqqətdə saxlayacaq və növbəti yazılarında işə qəbul mərhələsində kənarda qalan digər şəhid ailələri ilə bağlı faktları da ictimaiyyətin diqqətinə çatdıracaq.