İki il əvvəl Bakıya yağan yağış indiki qədər intensiv olmasa da, nəticə eyni olmuşdu – küçələr, tunellər su altında qalmış, hətta iki nəfər həyatını itirmişdi.

Belə hallarda normal olaraq məsul şəxslər cavab verməli, yol verilmiş nöqsanlara hüquqi qiymət verilməli idi. Çünki bu, təkcə təbii hadisə deyil, idarəetmədə buraxılan səhvlərin açıq nəticəsidir.

Aradan keçən müddətdə isə gözlənti o idi ki, müvafiq qurumlar nəticə çıxarsın, infrastruktur yenilənsin, yağış suları üçün effektiv drenaj sistemi qurulsun. Lakin görünən odur ki, heç bir ciddi addım atılmayıb. Bugünkü mənzərə bir daha göstərir ki, problem kökündən həll olunmayıb.

Bu vəziyyət ADSEA rəhbərliyinin fəaliyyətinin nə qədər səmərəsiz olduğunu açıq şəkildə ortaya qoyur. Bakı şəhəri plansız şəkildə betonlaşdırılıb, suyun təbii axını üçün lazım olan sahələr yoxa çıxarılıb.

Sabunçu tunelindəki kanalizasiya borularının vəziyyəti isə ayrıca acınacaqlıdır. Milyonluq saatlar taxan məmurların fonunda bu boruların ölçüsü və ötürücülük qabiliyyəti açıq-aşkar qeyri-adekvatdır.

Reallığı ört-basdır etməyin mənası yoxdur. Bəli, yağış normadan artıq yağa bilər. Amma fakt budur ki, normadan artıq olan təkcə yağıntı deyil – həm də bu sahəyə ayrılan vəsaitlərin necə xərcləndiyi ilə bağlı ciddi suallar var.