Bakunews.az – Son günlər sosial mediada yayılan bir paylaşım cəmiyyətin diqqətini yenidən Azərbaycan Dövlət Su Ehtiyatları Agentliyində baş verən ciddi idarəçilik problemlərinə yönəldib. Paylaşımda qeyd olunub ki, Bakının 6-cı mikrorayon ərazisində gecə saat 11-dən etibarən əhali sudan məhrum qalır, sakinlər əlində qab və butulka küçələrə çıxaraq su axtarır. Problemin səbəbi kimi isə agentlikdə "qudalar səltənəti"nin hökm sürdüyü iddia olunur.

Sosial şəbəkə istifadəçisi Elnurə Abuşova tərəfindən yayımlanan paylaşımda, agentlikdə çalışan və qohumluq əlaqələri ilə bir-birinə bağlı olan üç vəzifəli şəxs dairə ilə işarələnmiş şəkildə təqdim olunub. O, bu görüntünü "qudalar hakimiyyəti" adlandıraraq, agentliyin əsas funksiyası olan su təminatını yerinə yetirə bilmədiyini sərt şəkildə tənqid edib:

➡️ “Turbaya su töküb əhaliyə çatdırmağı bacarmırsız, çıxın gedin də!”

Hazırda 6-cı mikrorayon kimi əhalinin sıx yaşadığı ərazidə su çatışmazlığı artıq sosial problemə çevrilib. Əhalinin gündəlik tələbatını ödəməkdə çətinlik çəkdiyi bildirilir. Məsələ ilə bağlı aidiyyəti qurumlardan heç bir rəsmî açıqlama verilməyib.

Sosial şəbəkələrdə müzakirə olunan əsas suallar bunlardır:
- Su problemi texniki yoxsa idarəçilik səbəblidir?
- Agentlikdə qohumbazlıqla təyinatlar su ehtiyatlarının səmərəli idarə olunmasına mane olurmu?
- Dövlət qurumları ictimai nəzarətə açıqdırmı?

Ekspertlər bildirirlər ki, bu cür idarəçilik və qeyri-peşəkar təyinatlar ölkənin ən həssas sahələrindən biri olan su təchizatında keyfiyyətin aşağı düşməsinə səbəb olur. Dövlət strukturlarında qohumbazlıq, şəffaflıq və hesabatlılıqdan uzaq idarəetmə vətəndaşın dövlətə olan inamını sarsıdır.

Bakunews.az olaraq məsələni diqqətdə saxlayır və Azərbaycan Dövlət Su Ehtiyatları Agentliyindən rəsmi münasibət gözləyirik. (baku.news@mail.ru elektron adresimizə münasibətiniz göndərə bilərsiniz.)

Müxbir: Günel Abıyeva
Redaksiya: Bakunews.az