Aygün Əliyeva Saatlı rayonunda fəaliyyət göstərən bir QHT-ni satın alıb və öz yaxın rəfiqəsini onun formal sədri edərək, qrant ayırıb

QHT-lərə Dövlət Dəstəyi Agentliyində baş verən qanunsuzluqlar barədə araşdırmalarımızı davam etdiririk. Heç şübhəsiz ki, araşdırmalarımızda hər zaman olduğu kimi hansısa şəxsi mülahizələrə deyil, konkret faktlara, sənəd və fotolara istinad edirik.

Bu gün təqdim edəcəyimiz araşdırma isə əvvəlki “Rəfiqə qrantları”ndan bir qədər fərqlidir. Belə ki, əvvəlki araşdırmalarımızda təqdim etdiyimiz “Rəfiqə qrantları” QHT-lərə Dövlət Dəstəyi Agentliyinin icraçı direktoru Aygün Əliyevanın əlaqəsi olduğu rəfiqələrinin QHT-lərinə verdiyi qrant yardımlarından bəhs edirdik. Bu dəfə təqdim etdiyimiz araşdırmamızda isə Aygün Əliyevanın Saatlı rayonunda fəaliyyət göstərən bir QHT-ni necə satın alması və öz yaxın rəfiqəsini onun formal sədri edərək, həmin QHT-yə qrant ayırması yer alacaq.

Öncə qeyd etmək istəyirik ki, QHT-lərə Dövlət Dəstəyi Agentliyi əvvəlki illərdən fərqli olaraq son illər bütün qrant müsabiqələrində QHT rəhbərlərinin adlarını gizli saxlayır. Bunun əsas səbəblərindən biri də korrupsiya araşdırmalarının qarşısını almaqdır. Konkret faktlar var ki, son 1 ildə 54 satın alınmış QHT qrant müsabiqələrində qalib olub. Bu mövzunun araşdırmasını növbəti ildə geniş formada təqdim edəcəyik.

Lakin, QHT-lərə Dövlət Dəstəyi Agentliyinin 2022-ci il üzrə qrant müsabiqəsinin qaliblərinin siyahısında QHT rəhbərlərinin adlarının göstərilməsi araşdırmalar zamanı yardımçımız oldu. Diqqətimizi “Mərkəzi Aranda Regional İnkişaf İctimai Birliyi” adlı QHT çəkdi. Məlum oldu ki, əvvəlki illərdə Prezident yanında QHT- lərə Dövlət Dəstəyi Şurasından davamlı qrant alan həmin QHT sədri Əlicabbar Əhmədov olub. Lakin QHT-lərə Dövlət Dəstəyi Agentliyinin 2022-ci il qrant qalibləri siyahısında isə həmin təşkilatın sədri Nahidə Mahmudovadır(?)

Əsaslı şübhələr yarandığı üçün, bu təşkilatla bağlı ciddi araşdırmaya başladıq.

“Mərkəzi Aranda Regional İnkişaf İctimai Birliyi” 21 iyul 2006-cı ildə dövlət qeydiyyatından keçib. Hüquq ünvanı Saatlı rayonu, H.Zərdabi küçəsi 102-dir. Təşkilatın təsisçiləri Əlicabbar Əhmədov, Mehman Əhmədov və Gülbala Əhmədovdur. Qanuni təmsilçisi isə qeyd etdiyimiz kimi Əlicabbar Əhmədovun özü olub.

Pandemiya səbəbindən bir çox təşkilatlar kimi, “Mərkəzi Aranda Regional İnkişaf İctimai Birliyi” də “ölü təşkilatlar” siyahısına salınıb.

Nəhayət, 2022-ci ildə QHT-lərə Dövlət Dəstəyi Agentliyinin icraçı direktoru Aygün Əliyeva həmin vəzifəyə təyin edildikdən 3 ay sonra, bir neçə “ölü QHT”ni diriltmək qərarına gəlib. Bu istiqamətdə Yenixeber.org-a daxil olan məlumata görə, o, QHT sədrlərindən birinin vasitəçiliyi ilə bir neçə QHT-ni 6 min manata alaraq, onlara yenidən nəfəs verib. Beləliklə, QHT-lərə Dövlət Dəstəyi Agentliyi tarixində ilk dəfə yeni mərhələ, “ölü QHT”lərin dirilməsi mərhələsi başlayıb.

Aygün Əliyeva yaxın rəfiqələrindən biri, əvvəllər Binəqədi rayonunda, daha sonra TƏBİB-də birgə çalışdığı rəfiqəsi Nahidə Mahmudovanı aldığı təşkilatlardan birinə, “Mərkəzi Aranda Regional İnkişaf İctimai Birliyi”nə sədr təyin edir. Sözsüz ki, belə bir təyinat qanuni deyil, bunun üçün müvafiq hüquqi prosedurlar həyata keçirilməlidir. Lakin, burada nəinki qanunsuzluq, eləcə də ciddi korrupsiya faktı ortadadır.

Nəhayət, təqdim etdiyimiz fotodan da göründüyü kimi, 2022-ci ilin qrant müsabiqəsində Nahidə Mahmudovanın sədr kimi göstərildiyi “Mərkəzi Aranda Regional İnkişaf İctimai Birliyi”nə 9500 manat vəsait ayırır.

Fotolarda təqdim etdiyimiz kimi, Nahidə Mahmudova Aygün Əliyevanın dəstəyi ilə əvvəllər Binəqədi rayonunda, daha sonra isə TƏBİB sistemində onunla birgə işləyib.

Araşdırmalar zamanı o da məlum oldu ki, QHT-lərə Dövlət Dəstəyi Agentliyinin qrant nəticələrindən narazı qalan bir neçə QHT Aygün Əliyevanın yaxın rəfiqəsi Nahidə Mahmudovaya qrant verilməsi faktını bir neçə dəfə işıqlandırsalar da, aidiyyəti şəxslər bu məqama reaksiya verməkdən yayınıblar.

Ortada konkret faktlar olduğu halda, belə bir qanun pozuntusunun gizlədilməsi və ona reaksiya verilməməsi ciddi suallar doğurur.

Artıq bir müddətdir ki, “yenixeber.org” olaraq, kiçik komanda ilə QHT-lərə Dövlət Dəstəyi Agentliyində baş verən qanun pozuntularını, “rəfiqə qrantlarını”, bir neçə şirkət vasitəsilə dövlət satınalmalarının hansı şərtlər altında qalib olduğunu araşdıra biliriksə, demək ki, hüquq-mühafizə orqanları daha böyük və ciddi faktların üstünü aça bilər...(Yenixeber.org)

Qarşı tərəfin cavab haqqını tanıyırıq.