Şabranda körpü faciəsi: Valideynlər uşaqları çiynində çaydan keçirir – Borbor kəndindən fəryad
Şabran rayonunun Borbor kəndində vəziyyət kritik həddə çatıb. Sakinlərin BAKUNEWS-ə verdiyi məlumata görə, son aylarda yağan intensiv leysan yağışları nəticəsində Şabrançay üzərində yerləşən körpü tamamilə uçub və kəndlə məktəb arasında əlaqə kəsilib.
Hazırda kənddə yaşayan məktəblilər ciddi təhlükə ilə üz-üzədir. Valideynlər məcbur qalaraq azyaşlı uşaqları çiyinlərinə alıb çayın içi ilə qarşı tərəfə keçirməyə çalışırlar. Bu isə hər gün təkrarlanan təhlükəli bir mənzərə yaradır.
Sakinlər bildirir ki, çayın içindən keçid zamanı sürüşmə və yıxılma halları qaçılmazdır. Bu isə həm valideynlərin, həm də uşaqların xəsarət alması, hətta faciəvi nəticələrlə üzləşməsi riskini artırır.
“Hər gün ölüm qorxusu ilə uşağımızı məktəbə aparırıq. Bir dəfə ayağımız sürüşsə, nəticəsi çox ağır ola bilər” – deyə kənd sakinlərindən biri bildirib.
Mövcud vəziyyət uşaqların təhsilinə də mənfi təsir göstərir. Bir çox valideynlər təhlükəni nəzərə alaraq övladlarını məktəbə göndərməkdə tərəddüd edir, bu da onların dərsdən geri qalmasına səbəb olur.
Sakinlərin tələbi nədir?
Borbor kənd sakinləri aidiyyəti qurumlara səslənərək, təcili şəkildə Şabrançay üzərində yeni və təhlükəsiz körpünün inşa edilməsini xahiş edirlər. Onların sözlərinə görə, bu problem artıq sosial məsələ olmaqdan çıxıb, insan həyatı üçün real təhlükəyə çevrilib.
Bir kəndin taleyi, uşaqların həyatı və gələcəyi sözün əsl mənasında bir körpüdən asılı qalıb. Aidiyyəti qurumlar bu fəryadı nə vaxt eşidəcək?
Mövzu diqqətimizdədir.
Şikayət və təkliflər üçün qaynar xətt:
Əlaqə whatsapp:+994 70 402 02 85
BakuNews.az
Əlaqə whatsapp:+994 70 402 02 85
BakuNews.az
