Bakunews.az – Gəncə şəhərinin Cavadxan qəsəbəsində yaşayan sakinlər bir sıra ciddi infrastruktur və nəqliyyat problemləri ilə üz-üzədirlər. Xüsusilə 38 saylı marşrut xəttinin yalnız 1-ci küçə ilə fəaliyyət göstərməsi digər küçələrdə yaşayan sakinlərin gündəlik həyatında ciddi çətinliklər yaradır.

Sakinlərin sözlərinə görə, məktəblilər və işə gedib-gələn vətəndaşlar marşrut çatışmazlığı səbəbilə böyük əziyyət çəkirlər. Onlar 38 saylı marşrut xəttinin Məm-məd Nuriyev küçəsinə – konkret olaraq 11-ci küçəyə qədər uzadılmasını xahiş edirlər. Bu dəyişiklik 18, 20 və ətrafdakı digər küçələrdə yaşayanların da ictimai nəqliyyatdan rahat şəkildə istifadə etməsinə imkan verəcək.

Bundan əlavə, qəsəbədə küçə işıqlandırması da böyük problem olaraq qalır. 1-ci, 2-ci və 3-cü küçələrdə işıqlandırma olsa da, 4-cü küçədən 20-ci küçəyə qədər bu imkan yoxdur. Bu da xüsusilə axşam saatlarında vətəndaşların təhlükəsizliyi baxımından ciddi narahatlıq doğurur. Qaranlıq küçələrdə sahibsiz itlərin hücum təhlükəsi sakinlərin gündəlik həyatını təhlükə altında qoyur.

Yolların vəziyyəti isə daha bir narahatlıq doğuran məsələdir. Qəsəbənin daxili yolları bərbad vəziyyətdədir. Nəinki şəxsi avtomobillərlə, hətta təcili yardım, FHN və digər operativ nəqliyyat vasitələrinin hərəkəti belə çətinləşir. Yol şəraitsizliyi nəticəsində məktəbli uşaqlar dərslərə gecikir, təhsildən geri qalırlar.

Sakinlər Gəncə şəhərində asfalt örtükləri ilə bağlı işlərin getdiyini etiraf etsələr də, Cavadxan qəsəbəsinin bu işlərdən kənarda saxlanıldığını bildirirlər. Onlar müvafiq dövlət qurumlarından qəsəbədə yol, işıqlandırma və nəqliyyat problemlərinə dərhal müdaxilə edilməsini tələb edirlər.