Sabunçu rayonunda yerləşən və adı məlum olmayan bir şirniyyat sexində çəkilmiş görüntülər redaksiyamıza daxil olub. Bəşir Bünyadov 308 ünvanında yerləşən bu sexdə anti-sanitar vəziyyətin hökm sürdüyü açıq şəkildə görünür.

Kameralara düşən kadrlarda sexin daxili şəraiti, gigiyenik tələblərə uyğun olmayan avadanlıqlar, çirkli mühit və istehsal prosesindəki səhlənkarlıq faktları müşahidə edilir. Məlumatlara əsasən, idarəçi qadın sexə gündə təxminən 10 nəfərin gəlib-getdiyini etiraf edib. Bu isə, qanunvericiliyin pozulması fonunda hansısa qurumların məsuliyyətsizliyi və ya qeyri-rəsmi razılığı ehtimallarını artırır.

Qida təhlükəsizliyi təhdid altındadır. Belə şəraitdə hazırlanmış məhsulların istehlakçıya təqdim edilməsi ciddi sağlamlıq riski yaradır. Xüsusilə qeyd edilməlidir ki, Azərbaycan Qida Təhlükəsizliyi Agentliyi (AQTA) bu məsələni təcili olaraq nəzarətə götürməli, sexin lisenziyası və fəaliyyət statusu araşdırılmalıdır.

Redaksiya olaraq məsələ ilə bağlı aidiyyəti qurumlarla əlaqə yaratmağa çalışsaq da, hələlik rəsmi cavab ala bilməmişik. Lakin məsələ ilə bağlı araşdırmalarımız davam edir və əldə olunan hər yeni məlumat ictimaiyyətlə paylaşılacaq.

Vətəndaşların sağlamlığı və istehlak hüquqları naminə məsuliyyət daşıyan qurumların bu cür hallara laqeyd yanaşması yolverilməzdir.

Qarşı tərəfin mövqeyini dərc etməyə hazırıq.