Bakunews.az-ın əldə etdiyi məlumata görə, Ağgöl Milli Parkında brakonyerlik fəaliyyəti ilə məşğul olan şəxslər məhz qoruğun mühafizəsini təşkil edən yegerlərdir. Qoruq rəhbərliyi ilə əlbir olan bu şəxslər hər ay Ağgöldən külli miqdarda balıq ovlayaraq, Ağcabədi, İmişli, Beyləqan və Zərdab rayonlarında satışı təşkil edirlər.

Mənbələrimiz bildirir ki, bu qanunsuz fəaliyyətin başında yeger Rahim Gəncəliyevin oğlu Məhəmməd Gəncəliyev dayanır. O, bir neçə qrupdan ibarət dəstəyə rəhbərlik edir və həftədə iki dəfə növbəli şəkildə Ağgöldə qanunsuz balıq ovu həyata keçirirlər.

Məlumatlara əsasən, Məhəmməd Gəncəliyev və digər brakonyerlər Ağgöl Milli Parkının direktoru Xəzər Məhərrəmovun qardaşı oğlu Ceyhun Məhərrəmovun himayəsi altında fəaliyyət göstərirlər. Bir müddət əmisi Xəzər Məhərrəmovun sürücüsü işləyən Ceyhun Məhərrəmov hazırda brakonyerlərə dəstək verməklə onların iş ortağına çevrilib. Onun atası da Şərət gölü kimi tanınan su hövzəsində yegerlik (mühafizəçi) fəaliyyəti ilə məşğuldur.

Mənbə iddia edir ki, brakonyerlik fəaliyyəti ilə məşğul olan yegerlər hər ay Ceyhun Məhərrəmova müəyyən miqdarda pul ötürürlər. Havanın soyuq olması brakonyerlik fəaliyyətini bir qədər azaltsa da, mart, aprel və may aylarında Ağgöl qoruğunda kütləvi balıq ovu həyata keçirilir. Bu aylar ərzində balıqlar kürü tökmək üçün dayaz sulara toplaşır və brakonyerlər bundan sui-istifadə edirlər.

Ümid edirik ki, Ekologiya və Təbii Sərvətlər Nazirliyinin rəhbərliyi, xüsusən də nazir əvəzi Rəşad İsmayılov bu məsələyə ciddi yanaşaraq qanunsuzluğa qarşı mübarizə aparacaq.
Hörmətli Rəşad İsmayılovun diqqətinə çatdırırıq ki, Ağgöl Milli Parkının bəzi yegerləri Ağcabədi, İmişli və Beyləqan rayonlarında brakonyer kimi tanınırlar. Onların keçmişdə qanunsuz ovçuluqla məşğul olduqları və müəyyən yollarla Ağgöl Milli Parkında vəzifəyə gətirildikləri iddia edilir.

Bakunews.az olaraq məsələni diqqətdə saxlayırıq və araşdırmalarımız davam edir. Mövzuya yenidən qayıdacağıq.