Avrasiya İqtisadi İttifaqının hökumətlərarası şurasının Qırğızıstanda keçirilən iclasında Azərbaycan da qonaq qismində iştirak edib. Tədbirdə Azərbaycanı baş nazir Əli Əsədov təmsil edib.

Ə. Əsədov çıxışında bildirib ki, Azərbaycan Şimal-Cənub və Şərq-Qərb dəhlizləri kimi bir sıra irimiqyaslı layihələrdə mühüm həldəqir: "Avrasiya İttifaqındakı tərəfdaşlarımızın ölkəmizin tranzit potensialından istifadə etməsi üçün bundan sonra da lazım olan bütün şəraiti yaratmağa hazırıq. Əminəm ki, nəqliyyat koridoru fonunda əməkdaşlığımız bütün Avrasiya ərazisində stabil, ləyaqətli gələcəyin yaradılmasına mühüm töhfə verəcək”.

Mövzu ilə bağlı bakunews.az-ya qayraninfo-ya istinadən açıqlamasında ASDP sədri Araz Əlizadə bildirib ki, Bakı Aİİ-yə üzv olmaq üçün müraciət etməyəcək:

"Əməkdaşlığımızın nə qədər geniş olsa, bir o qədər yaxşı olar. Lakin Aİİ-yə üzv olmağımız üçün gərək Ermənistan da səs versin. Onun səs verəcəyini isə düşünmürəm. Azərbaycan ona görə də ora üzv olmaq üçün xahiş də etməyəcək”.

Politoloq Natiq Miri isə Əli Əsədovun Aİİ-nin tədbirinə qatılmasını Moskvaya ünvanlanan jest kimi dəyərləndirdi:

"Görünür, Aİİ-yə müşahidəçi statusu məsələsi müzakirə predmetidir. Kreml üçün Bakının müşahidəçi statusla həmin birlikdə iştirakı arzuolunandır. Əli Əsədovun Aİİ-nin tədbirində iştirakı əslində Azərbaycanın Rusiyaya jestidir. Əlbəttə ki, bu məsələ əvəzsiz deyil. Ona görə də həmin tədbirdə Azərbaycan baş nazirinin iştirakı iqtisadi amildən daha çox siyasi məqamlarla bağlıdır. Bakının Aİİ-yə üzvlüyünə elə bir zərurət yoxdur. Çünki ölkəmizin ixrac potensialının əksəriyyəti Qərblədir. Eyni zamanda, iki tərəfli kontekstdə Bakı keçmiş sovet respublikaları ilə rahat şəkildə ticarət edir. Moskva Qarabağda ədalətli mövqe nümayiş etdirirsə, erməni qanunsuz silahlı birləşmələri buradan çıxarılarsa, Bakı ilə İrəvan arasında sülh müqaviləsi imzalanarsa, Aİİ-də müşahidəçi statusunda iştirakımız heç bir problem yaratmayacaq. Əks təqdirdə bu gün Rusiyanın elə bir cəlbediciliyi yoxdur ki, Azərbaycan sözügedən birlikdə iştirak etsin”.

bakunews.az