“Nizami Gencevi adına Milli Azerbaycan Edebiyyatı müzesini gezme imkanı bulduk. Çok zengin ve Azerbaycan Kültür ve Medeniyyeti objelerini ihtiva eden bu müze görülmeye değer bir kültür merkezidir. Bu müzedeki çalışanlara başarılar diliyorum”.

Bu sözləri Tekirdağ Namık Kemal Universitetinin rektor müşaviri və İRCİCA-nın sabiq baş direktoru prof. Dr. Halit Eren Nizami Gəncəvi adına Milli Azərbaycan Ədəbiyyatı Muzeyinin Rəy kitabında qeyd edib.

Ötən gün muzeyin qonağı olan müşaviri Beynəlxalq Tərcümə və Anlama üzrə Şeyx Haməd Mükafatı Fondunun icraçı direktoru Ləbib Nəhhas, Dr. Zeki Şahin və filologiya üzrə fəlsəfə doktoru Şəms Bağırova müşayiət ediblər.

Qonaqları Ədəbiyyat Muzeyinin ekspozisiyası ilə Doktorantura və elmi inkişaf şöbəsinin elmi işçisi Rəhilə Sadıqova tanış edib, onlara Azərbaycan ədəbiyyatı barədə ərəb dilində ətraflı məlumat verib. Ziyalılar Azərbaycanın görkəmli ədibləri olan Nizami, Nəsimi və Füzulinin Şərq dünyasında kifayət qədər məşhur olduqlarını dilə gətiriblər. Beynəlxalq tərcümə məsələlərini yaxından izləyən fondun icraçı direktoru Ləbib Nəhhas ədəbiyyatımızla bağlı geniş informasiyanın ərəb dilində təqdim edilməsini yüksək qiymətləndirib və bildirib ki, gələcəkdə tərcümə sahəsində Nizami Muzeyi ilə əməkdaşlıq arzuolunandır.

Sonda muzeyin nəşrləri qonaqlara hədiyyə edilib.