Nizami Gəncəvi adına Milli Azərbaycan Ədəbiyyatı Muzeyində Rusiyada nəşr olunmuş “İslamın minarəsi” (“Minaret İslama”) beynəlxalq jurnalının Nizami Gəncəviyə həsr olunan xüsusi buraxılışının təntənəli təqdimatı keçirilib.

Tədbirdə Dünya dini liderlərinin qlobal Bakı Sammiti çərçivəsində ölkəmizdə səfərdə olan Rusiya Federasiyası Müsəlmanları Ruhani İdarəsinin sədri, müfti şeyx professor Ravil Qaynutdin, sədrin birinci müavini professor Dəmir Muhətdinov, qurumun Azərbaycan üzrə xüsusi nümayəndəsi Səfa Kərimov, həmin idarənin əməkdaşları, Nizami Muzeyinin kollektivi, ziyalılar və KİV nümayəndələri iştirak ediblər.

Əvvəlcə qonaqlar muzeyin klassik və müasir Azərbaycan ədəbiyyatının sərgiləndiyi ekspozisiya zalları ilə tanış olub, həm Azərbaycan ədəbiyyatı, həm də muzeyin yaranma tarixi haqqında məlumatlar əldə ediblər. Dahi Azərbaycan şairi Nizami Gəncəviyə həsr olunmuş ekspozisiya, şairin 800 illik yubileyi ilə əlaqədar çəkilmiş və mühüm tarixi hadisəni əks etdirən “Ermitaj. 1941-ci il. Nizami yubileyi” tablosu, eləcə də Mirzə Fətəli Axundzadənin rus şairi Aleksandr Puşkinin irsinə böyük rəğbətdən yaranmış “Puşkinin ölümünə Şərq poeması” qonaqların marağına səbəb olub.

Tədbiri giriş nitqi ilə açan muzeyin direktoru akademik Rafael Hüseynov qonaqları salamlayıb, ölkəmizin zəngin və qədim mədəniyyətindən, adət-ənənələrindən, Azərbaycandakı dini tolerantlıqdan və son dövrlərdə qazanılmış böyük uğurlardan söhbət açıb.

Azərbaycan-Rusiya münasibətlərindən danışan alim dövlətlərimiz arasında iqtisadi, siyasi, ədəbi, mədəni əlaqələrin yüksək səviyyədə olduğunu bildirib. O, Moskvadakı “Mədinə” Nəşriyyat evində nəşr olunan və Nizami Gəncəviyə həsr edilən “İslamın minarəsi” beynəlxalq jurnalının xüsusi buraxılışının təqdimatının Zəfər Günü ərəfəsində Bakıda keçirilməsini əlamətdar hadisə kimi dəyələndirib.

“Mədəniyyətləri birləşdirən Nizami körpüsü” mövzusunda məruzə ilə çıxış edən akademik Rafael Hüseynov dahi şair Nizaminin adının Rusiyada da yaşadığını, onun irsinin Rusiyada da sevildiyini və oxunduğunu qeyd edib. O, Nizami Gəncəvi yaradıcılığının müasir bəşəriyyət üçün aktuallığından danışaraq qeyd edib ki, ictimaiyyətə təqdim olunan nəşr Nizami Gəncəvi irsinin Rusiyada daha dəqiq tanıdılmasına əhəmiyyətli töhfədir.

Qeyd edilib ki, jurnalın bu nömrəsində dahi Azərbaycan şairi Nizami Gəncəvinin həyat və yaradıcılığı işıqlandırılıb, Azərbaycan tədqiqatçılarının məqalələri yer alıb. Bu nömrəyə "Ön söz"ü jurnalın baş redaktoru, ilahiyyat elmləri doktoru Damir Muxetdinov yazıb. Həmçinin jurnalda “Nizami poetik məktəbinin dünya əhəmiyyəti”, “Məhəmməd Füzuli adına Əlyazmalar İnstitutunda mühafizə olunan Nizami Gəncəvinin əlyazmaları”, “Nizami Gəncəvi klassik Şərq ədəbiyyatında roman ustası kimi”, “Nizami Gəncəvinin həyat yolu”, “Sonsuz Nizami Gəncəvi” mövzularında araşdırmalar yer alıb. Nizami əsərlərinin tərtibat və illüstrasiya nümunələri isə “İslamın minarəsi” jurnalının tematik sayının redaksiya heyətinin üzvü, Xalq rəssamı Səlhab Məmmədova məxsusdur.

Tədbirdə Rusiya Federasiyası Müsəlmanları Ruhani İdarəsinin sədri, müfti şeyx professor Ravil Qaynutdin, sədrin birinci müavini professor Dəmir Muhətdinov, Rusiyanın Azərbaycandakı səfiri Mixail Yevdokimov, Moskva Azərbaycanlılarının Milli-Mədəni Muxtariyyəti Şurasının sədri Bəxtiyar Həsənov çıxış edərək iki qardaş xalqın oxşar cəhətlərindən, tarixi və mənəvi bağlılığından bəhs ediblər.

Sonra muzeyin Komparativistika və bədii tərcümə şöbəsinin müdiri professor Şəfəq Əlibəyli “İslamın minarəsi” jurnalının özəllikləri” mövzusunda çıxış edərək müasir dövrdə İslam dininin yaradıcı, sülhsevər, humanist potensialından danışıb. O, jurnalın İslam dünyasından bəhs edən populyar elmi nəşr olduğunu və İslamın müasirlik kontekstində dərk olunmasında xüsusi rol oynadığını vurğulayıb.

Həmçinin Beynəlxalq əlaqələr və dünya muzeyləri şöbəsinin müdiri Nailə Əliyevanın “Nizami irsinin və Azərbaycan ədəbiyyatının ekspozisiyada təbliği” mövzusunda məruzəsi dinlənilib.

Tədbirdə Nizami Gəncəvinin həyat və yaradıcılığını əks etdirən sərgi nümayiş olunub.

Sonda Şeyx Ravil Qaynutdin Rafael Hüseynova II Yekaterina dövründə çap olunmuş “Qurani-Kərim”i və müəllifi olduğu kitabları təqdim edib. Rafael Hüseynov isə müəllifi olduğu “Sözün meracı”, Məhsəti Gəncəvinin rübailərini (rus və ərəb dillərində) və “Rübai mülkünün sultanı” kitablarını qonaqlara hədiyyə edib. Həmçinin o, professor Ravil Qaynutdinə, professor Dəmir Muhətdinova və Azərbaycan İlahiyyat İnstitutunun fəxri doktoru, jurnalın tematik sayının redaksiya heyətinin üzvü Səfa Kərimova təşəkkürnamələr təqdim edib.