Bərdənin 2 saylı orta məktəbində olan şəraitsizlik heç Qəzza zolağındakı hansısa təhsil müəssisəsində belə yoxdur. Yerli sakinlərin verdiyi məlumata görə, prezidentin sərəncamı ilə təmir edilən məktəbin nə işığı, nə istilik sistemi mövcuddur.

Bu mövzuda şəhid anası da dövlət rəhbərliyinə müraciət edib. Deyib ki, şagirdlərin təhsil alması üçün məktəbin işıq və istliklə təmin olunmasına ehtiyac var. Anaxeber.info bildirir ki, söhbət Bərdənin şəhər məktəbindən gedir və bu məsələyə yerli icra hakimiyyəti, regional təhsil idarəsi ciddi şəkildə laqeydlik nümayiş etdirir.

Məktəbin acınacaqlı vəziyyətlə üzləşməsinə heç bir tədbir görməyən icra başçısı Vidadi İsayev və regional təhsil idarəsi rəhbərliyi bu məsələdə susur. Halbuki dövlət vəsaitindən bu məktəbə böyük pullar xərclənib.

Eyni zamanda, Elm və Təhsil Nazirliyinə edilən müraciətlər nəticə vermir. Sakinlər xahiş edirlər ki, onların səsinə səs verilsin və tezliklə məktəbin fəaliyyəti bərpa olunsun. Çünki yüzlərlə şagird təhsildən məhrum olub. Bu da ciddi bir zərbədir. İlin-günün bu vaxtında Bərdənin mərkəzində məktəbin işıqsız və istiliksiz qalmasını yalnız biabırçılıq adlandırmaq olar. Amma vəziyyət o həddə çatıb ki, prezidentdən köməklik istənilir. Hərçənd, bir məktəbin probleminin həlli yerli icra başçısı Vidadi İsayev və təhsilə cavabdeh məmurların tapşırığı əsasında də həll oluna bilərdi. Amma onların biganəliyi sakinləri dövlət başçısına müraciət etməyə məcbur qoyub.


Bərdə rayon icra hakimiyyəti müraciətə açıqlama verib.
Bildiririk ki, Qarabağ Regional Təhsil İdarəsi tərəfindən verilmiş məlumata əsasən sözügedən məktəbdə sayğaclar sovet dövründən qalmış sayğaclardır, 2 fazalıdır, hazırda 3 faza tələb olunur. Otaq saylarına uyğun yeni sayğacın sifarişi verilmişdir. Texniki şərtə uyğun cavab verildikdə yaxın zamanda yeni sayğac quraşdırılacaqdır. Hazırda məktəbdə elektrik və istiliklə bağlı heç bir problem yoxdur.

Anaxeber.info