Milli Təhlükəsizlik Nazirliyinin (MTN 2015-ci ildə ləğv olunub - E.M.) Energetika və Nəqliyyat Sahələrində Təhlükəsizlik Baş İdarəsinin sabiq rəisi Akif Çovdarova məxsus olduğu deyilən “Evrostroy-S.S” Məhdud Məsuliyyətli Cəmiyyət (MMC), “Zaman-İ” Mənzil Tikinti Kooperativi (MTK) və SİPARK Yaşayış Kompleksinin rəhbəri Taleh Abbasov məhkəməyə verilib.

“Qaynarinfo”nun məlumatına görə, Taleh Abbasovla bağlı məhkəməyə “Yapı Kredi Bank Azərbaycan” Qapalı Səhmdar Cəmiyyəti (QSC) müraciət edib. Cavabdeh qismində iş adamının şərikləri - Rizvan Əhməd oğlu Abdullayev, Seymur Nizami oğlu İsayev, İsmayıl Əziz oğlu Ələsgərov, Rəşad Cəmil oğlu Abbasov və Ramin Bəxtiyar oğlu Məmmədovdur. Cavabdeh qismində olan şirkətlər isə “Zaman-İ” MTK və “Evrostroy-S.S” MMC-dir. İşin mahiyyəti maddi ziyanın ödənilməsindən ibarətdir. Bir neçə gün əvvəl Bakının Binəqədi rayon sakini A.Ağayev “Evrostroy-S.S” MMC-nin rəhbəri Taleh Fəmail oğlu Abbasov və onun şəriki Seymur Nizami oğlu İsayev tərəfindən dələduzluğa məruz qaldığını iddia edib. A.Ağayev Taleh Abbasovun ona satdığı mənzilləri mənimsədiyini, həmçinin əlavə olaraq külli miqdarda pul aldığını deyib. “Evrostroy-S.S” MMC-nin hazırda dövlət büdcəsinə 8 milyon 969 min 636 manat 7 qəpik vergi borcu var. Qeyd edək ki, bu şirkətlərin Akif Çovdarova məxsus olduğu deyilir.

Akif Çovdarov 2017-ci ildə Bakı Hərbi Məhkəməsinin hökmü ilə 12 il müddətinə azadlıqdan məhrum edilib. Hökmə əsasən, onun 30 milyon manatlıq əmlakı müsadirə edilib, general rütbəsindən məhrum edilməsi üçün Prezidentə təqdimat göndərilib. Dövlət başçısının sərəncamı ilə general rütbəsindən məhrum olunaraq əsgər rütbəsinə endirilib. Akif Çovdarov 2020-ci ildə imzalanmış əfv sərəncamı ilə azadlığa buraxılıb.

Akif Çovdarovun şirkətlərinə qarşı hücumdan az əvvəl Bakı Kommersiya Məhkəməsi onun oğlu Ruslan Çovdarovun ölkədən çıxışına “stop” qoyub. Buna səbəb isə icra orqanının rəhbəri Ruslan Çovdarova qarşı xüsusi icraat - vergi ödəyicisi olan fiziki şəxslərin və ya hüquqi şəxslərin ölkədən getmək hüququnun müvəqqəti məhdudlaşdırılması haqqında işlər üzrə icraat (xüsusi icraat) barədə tələb irəli sürməsi idi.

Ruslan Çovdarov atası vəzifədə olduğu dövrdə Milli Məclis Aparatının İqtisadi qanunvericilik şöbəsində sektor müdiri işləyib. 2015-ci ildə Eldar Mahmudov milli təhlükəsizlik naziri vəzifəsindən çıxarılandan dərhal sonra Ruslan Çovdarov da ərizəsi ilə işdən ayrılıb, 1 ay sonra isə atası həbs edilib. Akif Çovdarovun özü ilə yanaşı oğlu Ruslan da istintaqa cəlb olunub. İstintaq zamanı Çovdarovların çox böyük varidata sahib olduqları bəlli olmuşdu. Məhkəmə hökmü ilə həmin varidata sahiblənmək üçün Akif Çovdarovun vəzifəsindən sui-istifadə etməklə çeşidli cinayətlər törətdiyi əksini tapıb.

Akif Çovdarov Bakı Hərbi Məhkəməsinin hökmü ilə ittiham üzrə təqsirli bilinərək 12 il müddətinə azadlıqdan məhrum edilmişdi. Hökmə əsasən, Akif Çovdarovun general rütbəsinin alınması ilə bağlı ölkə prezidentinə təqdimat göndərilməsi barədə xüsusi qərar da çıxarmış və icra olunmuşdu. Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər Akif Çovdarova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.

“Bakı” Hüquq Şirkətinin rəhbəri Natiq Ələsgərov “Yeni Müsavat”a deyib ki, vəzifədə olarkən sui-istifadə hallarına yol verən, Azərbaycan Respublikası adından çıxarılan məhkəmə hökm və qərarlarına hörmət etməyən, özünü qanunlardan üstün hesab edən hər kəs nəticə etibarı ilə qanuna, məhkəməyə möhtac qalır: “Akif Çovdarov vəzifədə olarkən etdiyi qanunsuzluqlar məhkəmə hökmü ilə təsdiqlənib. Halbuki Akif Çovdarov vəzifədə olarkən qanunsuzluq etməsəydi, vəzifəsindən sui-istifadə etməsəydi, bu gün onun, oğlunun bunca problemləri də olmayacaq. Məsələ burasındadır ki, Azərbaycanda vəzifəyə təyin olunan bir çoxlarının təfəkkürü olduqca dardır, hətta orta əsrlərdəki feodallardan fərqlənməyənləri də var. Bu adamların düşüncələrinə görə vəzifə çapıb-talamaq, başqalarının hüquqlarını pozmaqla şəxsi varidat toplamaq üçün vasitədir. Və bu cür yanaşma ilə vəzifədə qalıb qanunsuzluq edənləri Akif Çovdarovun hazırda düşdüyü durum gözləyir. Biganəlik, süründürməçilik, bürokratizmə meyllilik Azərbaycan məmurunun gündəlik həyat tərzi olmamalıdır. Vəzifələrdə olanların bir çoxlarının hesabatsızlığı, məsuliyyətsizliyi, kobudluğu var. Bilirlər ki, onlarla vətəndaş arasında bir ciddi bağlılıq yoxdur. Eyni zamanda cəzasızlıq mühiti də var. Normal olmayan davranışlarına, yaxud da öz vəzifə səlahiyyətlərini yerinə yetirməmələrinə görə uzun müddət cəzasız qalırlar və bu mühit ümumilikdə ölkədəki münasibətlərə təsir edir. Akif Çovdarov nümunəsində biz gördük ki, kimsə qanundan üstün deyil. Vaxtilə onun adı gələndə bir çoxlarının əl-ayağı əsirdi, buğun isə Akif Çovdarovun oğlu ölkədən çıxa bilmir, onun özü generaldan əsgərə qədər endirilib, təltifləri alınıb, əmlakları ilə bağlı məsələ də göz qarşısındadır”.

Natiq Ələsgərov təəssüflə qeyd edib ki, məmurların davranışlarının qarşısının alınması üçün məhkəmə-hüquq islahatların real olaraq dərinləşməsinə çox ciddi ehtiyac var: “Qanunvericilik, icra və məhkəmə hakimiyyəti, o cümlədən 4-cü hakimiyyət sayılan kütləvi informasiya vasitələri arasındakı sərhədlər itmiş vəziyyətdədir. Faktiki olaraq hakimiyyət strukturları bir-birilərinə inteqrasiya edərək vahid quruma çevriliblər. Məhz buna görədir ki, korrupsiya, vəzifəli şəxslərin özbaşınalığı səmərəli şəkildə araşdırılmır. Məmurların əməlləri hüquqi qiymətini almır və qanunsuzluqların kökünün kəsilməsi üçün tədbirlər kəsərli olmur”.