Bravo" marketlər şəbəkəsində satışa çıxarılan məhsulun keyfiyyəti ilə bağlı növbəti şikayət sosial şəbəkələrdə müzakirələrə səbəb olub.


Musavat.com xəbər verir ki, Saşa Qançarova adlı vətəndaş sosial media hesabında paylaşdığı fotoda "Holland pendiri"nin kifləndiyini iddia edib. Onun sözlərinə görə, məhsulun üzərində son istifadə tarixinin 7 iyul olduğu göstərilsə də, pendir artıq xarab olub və satışdan yığışdırılmayıb.


Paylaşımın altında digər istifadəçilər də müxtəlif "Bravo" filiallarında oxşar hallarla qarşılaşdıqlarını bildiriblər. Onlar vaxtı keçmiş və ya keyfiyyəti şübhə doğuran məhsulların satışda saxlanıldığını iddia edərək marketlərdə ümumi yoxlamaların aparılmasının vacibliyini vurğulayıblar.


Vətəndaşlardan biri yazıb ki, "Bravo Express" mağazalarından birində kiflənmiş çörəklərlə rastlaşıb. Onun sözlərinə görə, satıcılara xəbərdarlıq etdikdən sonra yalnız görünən çörəklər yığışdırılıb, digər məhsullar isə yoxlanılmayıb.


Başqa bir istifadəçi isə "Bravo Əhmədli" hipermarketində xarab olmuş ət məhsulu gördüyünü iddia edib. O bildirib ki, şikayətdən sonra yalnız həmin məhsul piştaxtadan götürülüb, digər məhsullar isə vitrin silinən əski ilə təmizlənərək yenidən satışda saxlanılıb.


Digər şərhlərdə isə Nizami və Əhmədli filiallarında da vaxtı keçmiş süd məhsulları və digər ərzaqların rəflərdə qalması ilə bağlı narazılıqlar səsləndirilib.


Məsələyə "Bravo"nun Müştəri Xidmətləri də münasibət bildirib. Şirkət vətəndaşdan üzr istəyərək qeyd edib ki, məhsulların keyfiyyəti onlar üçün prioritetdir və belə halların təkrarlanmaması üçün nəzarət tədbirləri gücləndiriləcək.


Marketlər şəbəkəsi müraciətin araşdırılması məqsədilə vətəndaşdan hadisənin baş verdiyi filialın ünvanını, alış-veriş qəbzini (mövcud olduğu halda) və əlaqə nömrəsini təqdim etməsini xahiş edib. Şirkət bildirib ki, mağaza rəhbərliyi məsələni ətraflı araşdırmaq üçün şikayətçi ilə əlaqə saxlayacaq.


Qeyd edək ki, sosial şəbəkələrdə səsləndirilən iddialar hələlik vətəndaşların şəxsi paylaşımlarına əsaslanır. Rəsmi qurumlar tərəfindən bu məsələ ilə bağlı hər hansı yoxlamanın nəticəsi açıqlanmayıb.


Musavat.com