01 iyun 2026-cı il tarixində müəllim Mədinə Hallacova sosial şəbəkə hesabında açdığı canlı yayım zamanı Füzuli Təhsil Sektorunda baş verdiyini iddia etdiyi qanunsuzluqlar, maliyyə pozuntuları və idarəçilik problemləri barədə geniş açıqlamalar verib.

O, Mərkəzi Aran Regional Təhsil İdarəsinin rəhbəri Eşqi Bağırov tərəfindən onun barəsində verilmiş əmrin qanunsuz olduğunu bildirərək aidiyyəti dövlət qurumlarını səsləndirilən faktları araşdırmağa çağırıb.

Mədinə Hallacovanın iddialarına görə, Füzuli rayonu Kərimbəyli kənd tam orta məktəbində iki ildən artıq müddətdə saxta ştat vahidləri yaradılıb və bu ştatlar vasitəsilə dövlət büdcəsindən ayrılan vəsaitlərin təyinatı üzrə istifadə olunmadığı ehtimal edilir. Onun sözlərinə görə, Qarabağ Regional Təhsil İdarəsi yalnız cari ilin fevral ayında bu məsələ ilə bağlı araşdırmalara başlayaraq müəyyən ixtisarlar həyata keçirib.

Canlı yayım zamanı Füzuli Təhsil Sektorunun baş mühasibi Əli Heydərovun adı da hallandırılıb. Şikayətçi iddia edir ki, baş verən maliyyə pozuntularına uzun müddət göz yumulub və bu prosesdə məsul şəxslər lazımi tədbirlər görməyiblər.

Mədinə Hallacova bildirib ki, yeni ştat vahidlərinin yaradılması zamanı Füzuli Təhsil Sektorunun müdiri Ramella Məmmədova, müşavir Camal Xəlilov və baş mühasib Əli Heydərov tərəfindən sənədlərin imzalanması dövlət vəsaitlərinin xərclənməsi ilə bağlı ciddi suallar yaradır.

Şikayətçi sektorda əmək qanunvericiliyinin tələblərinin pozulduğunu da iddia edib. Onun sözlərinə görə, bəzi işçilərə minimum əməkhaqqından aşağı maaş ödənilməsi halları mövcuddur. Həmçinin yarımştat vəzifələr üzrə əlavə işçilərin rəsmiləşdirilməsi nəticəsində maliyyə intizamının pozulduğu bildirilib.

Canlı yayımda müəllim özünün 2010-cu ildə Kərimbəyli kənd tam orta məktəbinə yerdəyişməsi ilə bağlı məsələyə də toxunub. O bildirib ki, həmin vaxt boş vakansiya olduğu bildirilsə də, sonradan həmin yer üzrə başqa müəllimlərin də fəaliyyət göstərdiyi məlum olub. İddialara görə, cəmi 25 saatlıq dərs yükü bir neçə müəllim arasında bölüşdürülüb.

Mədinə Hallacova yoxlama proseslərinin aparılması zamanı da ciddi nöqsanlara yol verildiyini iddia edir. Onun sözlərinə görə, fəaliyyəti ilə bağlı tərtib olunan iki aktın hüquqi əsası hesab edilən rəsmi əmrlər mövcud olmayıb və sənədlər yalnız əsasnaməyə istinad edilməklə hazırlanıb.

Şikayətçi təhsil müəssisələrində aparılan yoxlamaların obyektivlik və şəffaflıq prinsiplərinə uyğun təşkil edilmədiyini də bildirib. Onun sözlərinə görə, məktəb direktorlarının digər məktəbləri, bağça müdirlərinin isə digər bağçaları yoxlamaya cəlb edilməsi həm peşə etikası, həm də məxfilik baxımından ciddi problemlər yaradır.

Mədinə Hallacova daha sonra Füzuli Təhsil Sektorunun müdiri Ramella Məmmədovanın müəllimlərə təzyiq göstərdiyini və bəzi hallarda məktəblərə polis əməkdaşlarının çağırıldığını iddia edib. O bildirib ki, siniflərin komplektləşdirilməsi qaydalarına əməl olunmadan bəzi siniflərin bağlanması halları baş verib.

Şikayətçi Azərbaycan Təhsil İşçiləri Azad Həmkarlar İttifaqının Füzuli rayon komitəsinin sədri Gülnaz Kərimovanın fəaliyyətindən də narazılığını ifadə edib. Onun sözlərinə görə, işçilərin hüquqlarının müdafiəsi istiqamətində təqdim olunan müraciətlərə baxılmır və qanunsuz işdən çıxarıldığını iddia edən şəxslərə dəstək göstərilmir.

Canlı yayım zamanı Füzuli Təhsil Sektorunun müşaviri Camal Xəlilov barədə də iddialar səsləndirilib. Mədinə Hallacova onun keçmişdə yol-nəqliyyat hadisəsi ilə bağlı məsuliyyət daşıdığını və buna baxmayaraq hər hansı intizam tədbirinə məruz qalmadığını bildirib.

Sonda Mədinə Hallacova aidiyyəti dövlət qurumlarını səsləndirdiyi iddiaları araşdırmağa çağıraraq, Ramella Məmmədova, Camal Xəlilov, Əli Heydərov və Gülnaz Kərimovanın fəaliyyətinə hüquqi qiymət verilməsini tələb edib.

Qeyd edək ki, məqalədə yer alan bütün məlumatlar Mədinə Hallacovanın sosial şəbəkə hesabında səsləndirdiyi iddialara əsaslanır. Qarşı tərəfin mövqeyini dərc etməyə hazırıq və onların cavab hüququnu tanıyırıq.