Yevlax sakini Pərvanə Novruzova tərəfindən redaksiyamıza təqdim olunan müraciətdə estetik əməliyyatın nəticələri ilə bağlı bir sıra iddialar səsləndirilib.

Vətəndaşın bildirdiyinə görə, o, 22 yanvar 2024-cü il tarixində “Royal Aesthetic Centre” MMC-nin nəzdində fəaliyyət göstərən “Referans Estetik Mərkəzi”ndə septorinoplastika əməliyyatı keçirib. Onun sözlərinə əsasən, əməliyyat Rövşən Babayev tərəfindən icra olunub və bununla bağlı klinika tərəfindən ona müvafiq arayış təqdim edilib.

Pərvanə Novruzova iddia edir ki, əməliyyatdan sonra həm sağlamlıq vəziyyətində, həm də estetik görünüşündə onu qane etməyən nəticələr yaranıb. Şikayətçi bildirir ki, məsələ ilə bağlı klinikaya müraciət etsə də, ödədiyi vəsaitin geri qaytarılması əvəzinə ona təkrar əməliyyat təklif olunub.

Vətəndaş həmçinin qeyd edir ki, açıq mənbələrdə və aidiyyəti qurumların yaydığı məlumatlarda plastik və estetik cərrahiyyə fəaliyyəti ilə məşğul olmaq üçün icazə verilən mütəxəssislərin siyahısını araşdırarkən Rövşən Babayev adına rast gəlmədiyini iddia edir. Bu halın onda əlavə narahatlıq yaratdığını bildirən şikayətçi məsələ ilə bağlı aidiyyəti dövlət qurumlarına rəsmi müraciət ünvanlayıb.

Müraciətdə Rövşən Babayevin plastik və estetik cərrahiyyə fəaliyyəti ilə məşğul olmaq üçün qanuni səlahiyyətlərinin olub-olmamasının, əməliyyatın tibbi standartlara uyğun aparılıb-aparılmamasının, eləcə də obyektiv tibbi ekspertizanın təyin edilməsinin araşdırılması xahiş olunur.

Məsələ ilə bağlı qarşı tərəfin mövqeyini öyrənmək üçün Rövşən Babayevlə əlaqə saxladıq. Lakin həkim səsləndirilən iddialara münasibət bildirməkdən imtina etdi. Telefon danışığı zamanı o, yayımlanacaq materialla bağlı məhkəməyə müraciət edə biləcəyini bildirdi və suallarımıza ətraflı cavab vermədi.

Bununla yanaşı, redaksiya tərəfindən Azərbaycan Respublikası Səhiyyə Nazirliyi tərəfindən ictimaiyyətə açıqlanan plastik cərrahların siyahısı da nəzərdən keçirilib. Araşdırma zamanı şikayətdə adı çəkilən Rövşən Babayevin adına həmin siyahıda rast gəlinmədiyi müşahidə olunub. Bununla belə, həmin faktın onun fəaliyyətinin qanunsuz olması anlamına gəlib-gəlmədiyi barədə yekun qiymət vermək səlahiyyəti yalnız aidiyyəti dövlət qurumlarına məxsusdur.

Qeyd edək ki, məqalədə yer alan bütün məlumatlar vətəndaşın müraciətində səsləndirdiyi iddialara əsaslanır. Redaksiya olaraq məsələ ilə bağlı Səhiyyə Nazirliyi, TƏBİB, Analitik Ekspertiza Mərkəzi və digər aidiyyəti qurumların rəsmi mövqeyini dərc etməyə hazırıq.

Araşdırmanın nəticələri və qurumların cavabları daxil olduqdan sonra mövzu üzrə əlavə məlumat təqdim ediləcək.