Son günlər sosial şəbəkələrdə temporal üz gərmə əməliyyatı keçirmiş pasiyent İnci Babayevanın səsləndirdiyi iddialar müzakirə mövzusuna çevrilib. Məsələ ilə bağlı həkim Gülbadə Abdullayevanın mətbuat katibi Mirkənan Seyidov açıqlama verərək bir sıra məqamlara aydınlıq gətirib.

Onun sözlərinə görə, hadisəyə emosional yanaşmaq əvəzinə məsələnin tibbi aspektləri nəzərə alınmalıdır. Çünki estetik və rekonstruktiv cərrahiyyədə əməliyyatdan sonrakı dövrün özünəməxsus xüsusiyyətləri mövcuddur və bir çox hallarda pasiyentlərin yaşadığı narahatlıqlar tibbi baxımdan normal bərpa prosesinin tərkib hissəsi hesab olunur.

Mütəxəssislərin fikrincə, temporal üz gərmə əməliyyatından sonrakı ilk günlərdə ağrı, gərginlik hissi, ödem, şişkinlik, qansızmalar və müəyyən hissiyat dəyişiklikləri müşahidə oluna bilər. Bu əlamətlərin mövcudluğu əksər hallarda əməliyyatın uğursuz olması anlamına gəlmir və normal sağalma prosesinin bir hissəsi hesab edilir.

Tibbi ədəbiyyatda da qeyd olunur ki, üz nahiyəsində aparılan estetik əməliyyatlardan sonra sinir uclarının regenerasiyası müəyyən zaman tələb etdiyindən pasiyentlərdə keçici keyləşmə və ya hissiyat azalması halları müşahidə edilə bilər. Bu səbəbdən əməliyyatdan qısa müddət sonra yalnız pasiyentin subyektiv hisslərinə əsaslanaraq hər hansı tibbi qənaətə gəlmək mümkün deyil.

Mətbuat katibi bildirir ki, sosial şəbəkələrdə yayılan açıqlamalarda əsas diqqət çəkən məqamlardan biri pasiyentin əməliyyatdan təxminən iki gün sonra tikiş və yara nahiyəsinə müdaxilə etməsi ilə bağlı iddialardır.

Tibb mütəxəssisləri qeyd edirlər ki, əməliyyatdan sonrakı ilk günlərdə tikiş və yara sahəsinə steril olmayan müdaxilələr infeksiya, qanaxma, hematoma, tikişlərin zədələnməsi və sağalma prosesinin pozulması kimi ağırlaşmalar yarada bilər. Məhz bu səbəbdən bütün plastik cərrahlar pasiyentlərə yara sahəsinə özbaşına müdaxilə etməməyi tövsiyə edirlər.

Həkimlərin fikrincə, əgər əməliyyat zamanı tikiş qoyulmaması və ya yaranın tam açıq qalması kimi ciddi texniki qüsur mövcud olsaydı, bunun nəticələri bir neçə gün sonra deyil, çox qısa müddət ərzində özünü göstərə bilərdi. Belə hallarda davamlı qanaxma, kəskin ağrı, toxumaların ayrılması və digər ağır klinik əlamətlər müşahidə olunardı.

Klinika tərəfinin bildirdiyinə görə, pasiyent əməliyyatdan sonra müşahidə müddətini başa vuraraq tibb müəssisəsini tərk edib və sonradan təxminən bir gün yarım ərzində yaranın vəziyyəti ilə bağlı klinikaya hər hansı təcili müraciət etməyib.

Mütəxəssislər vurğulayırlar ki, əməliyyatdan sonrakı dövrdə pasiyent hər hansı narahatlıq hiss etdikdə ilk növbədə əməliyyatı həyata keçirən həkim və ya klinika ilə əlaqə saxlamalıdır. Çünki yalnız vizual müayinə və tibbi qiymətləndirmə əsasında problemin səbəbini müəyyən etmək mümkündür.

Mirkənan Seyidovun sözlərinə görə, İnci Babayeva tərəfindən səsləndirilən bəzi iddialar hazırda yalnız şəxsi mövqe xarakteri daşıyır və onların tibbi əsaslı olub-olmaması müstəqil ekspertiza olmadan müəyyən edilə bilməz.

"Klinika olaraq hesab edirik ki, istənilən pasiyentin şikayət etmək hüququ var. Lakin tibbi məsələlərin qiymətləndirilməsi sosial şəbəkələrdə yayılan videolar və emosional çıxışlar əsasında deyil, tibbi sənədlər, əməliyyat protokolları, müayinə nəticələri və müstəqil ekspert rəyləri əsasında aparılmalıdır", – deyə açıqlamada qeyd olunur.

Məsələ ilə bağlı yekun tibbi və hüquqi qiymət yalnız aidiyyəti qurumların araşdırması və müstəqil tibbi ekspertiza rəyləri əsasında verilə bilər. Hazırda tərəflərin səsləndirdiyi fikirlər onların mövqeyi kimi qiymətləndirilir.