Son illərdə Prezident İlham Əliyevin rəhbərliyi ilə Azərbaycan dövlətinin yol-nəqliyyat infrastrukturu sahəsində atdığı addımlar böyük uğurlarla yadda qalıb. Lakin bəzi yerli məmurların tamahkarlığı bu uğurları kölgələyir, vətəndaşların qanuni haqlarını tapdalayaraq şəxsi mənfəətlərini artırır. Bu, yalnız mənəvi yox, hüquqi və sosial cəhətdən də qəbuledilməzdir.

Məsələ, xüsusilə Azərbaycan Avtomobil Yolları Dövlət Agentliyi (AAYDA)-nın keçmiş rəhbəri Saleh Məmmədov dövründən qalan neqativ tendensiyaların günümüzdə də davam etməsi ilə bağlıdır. Pirşağı–Novxanı–Xırdalan–M4 avtomobil yolu layihəsi bu cür qanunsuzluqların ən bariz nümunəsidir.

Vətəndaşların hüquqları tapdalanır

AAYDA-nın İnvestisiya Layihələri üzrə Yol Əsası və Mühafizə Zolağında olan Maneələrin Aradan Qaldırılması və Monitorinqi Şöbəsi, vətəndaşların mülkiyyət hüquqlarını qorumaq əvəzinə, onları əmlaklarını itirməyə məcbur edir. Bu şöbənin üç əməkdaşı – Surət, Mehman və Elvin – vətəndaşların kompensasiyalarını azaltmaq, torpaqlarını aşağı qiymətlə qohumlarının adına sənədləşdirmək, sonra isə yüksək məbləğdə kompensasiya qazanmaq kimi qanunsuz əməllərlə məşğuldur.

Fatmai, Mehdiabad, II Sovxoz və Bitçililik İnstitutunun yaxınlığında torpaq sahələrinin yarısı və ya bir hissəsi üçün kompensasiya ödənilmir, bəzi hallarda isə vətəndaşlara heç bir ödəniş edilmədən torpaq üzərində körpü və yol qovşaqları inşa edilir. Hətta Ulu Öndər Heydər Əliyev tərəfindən vətəndaşlara əvəzsiz verilmiş torpaqlara da bu qrup tərəfindən qanunsuz müdaxilə olunur.

Vətəndaşlar bu şəxsləri “3 muşketyor” adlandırır – həm ironik, həm də ağrılı bir etiraf olaraq. Onlar vətəndaşları az kompensasiyaya razı salmaq üçün çıxarışların etibarlılığına əsassız iradlar bildirir, bir çox hallarda isə vətəndaşların haqlı tələblərini görməzdən gəlirlər. Bu, yalnız hüquq pozuntusu deyil, həm də dövlət siyasətinə açıq meydan oxumaqdır.

Bu cür əməllər dövlətin nüfuzuna ciddi zərbə vurur, vətəndaşların dövlətə inamını sarsıdır və sosial narazılığı artırır. Yol-nəqliyyat layihələri kimi strateji əhəmiyyətli işlər, vətəndaşların haqlarını pozmaqla həyata keçirilirsə, bu artıq cinayətkar və korrupsioner fəaliyyət səviyyəsinə çıxır.

Azərbaycan dövlətinin apardığı yol layihələri və inkişaf strategiyası böyük uğur hesab oluna bilər. Lakin Saleh Məmmədovun yetirmələri və onların “3 muşketyor”u bu uğurları gölgələyir. Dövlət və hüquq-mühafizə orqanları dərhal bu şəxslərin qanunsuz əməllərini araşdırmalı, vətəndaşların haqlarını bərpa etməli və belə korrupsioner praktikaların qarşısını kəskin şəkildə almalıdır.

Vətəndaşların hüquqlarının tapdanmasına və dövlət vəsaitlərinin mənimsənilməsinə qarşı ictimai nəzarət gücləndirilməli, bu cür halların təkrarlanmasına imkan verilməməlidir. Əks halda, yol layihələrinin uğurları, yalnız bir neçə şəxsin şəxsi mənfəətinə xidmət edən hüquq pozuntuları ilə xatırlanacaq.