2014-cü ildən qanuni qüvvəyə minmiş aliment qətnaməsi olsa da, bu günə qədər nə icra olunub, nə də cavabdeh tərəf öhdəliyini yerinə yetirib. Həyat yoldaşı tərəfindən övladına aliment ödənilməyən qadın artıq 10 ilə yaxındır ki, həm hüquqi, həm də sosial ədalət axtarışındadır.

Söhbət Süleymanova Yasəmən Müşfiq qızından gedir. O bildirir ki, rəsmi sənədlə alimentin ödənilməsi barədə qərar mövcuddur. Lakin illərdir bu qətnamə icraya yönəldilməyib. Nəticədə, qadın nə aliment ala bilir, nə də ailəsinə dövlət tərəfindən sosial yardım göstərilir. Halbuki bu cür hallarda qanunvericilik aliment icra olunmadıqda vətəndaşın sosial təminat almasına əngəl olmamalıdır.

Məsələnin daha acınacaqlı tərəfi isə video görüntülərdə üzə çıxıb. Belə ki, ailənin yaşadığı evin vəziyyəti də sosial yardıma ehtiyacın nə qədər dərin olduğunu göstərir. Qəzalı vəziyyətdə olan, istismar üçün yararsız görünən bu mənzildə bir ana və uşaqları ağır şəraitdə yaşamağa məcbur olub.

Süleymanova Yasəmən aidiyyəti qurumlara – Ədliyyə Nazirliyi, İcra və Probasiya Şöbəsi, DOST Mərkəzi və DSMF-ə müraciət etsə də, hələ də müsbət nəticə əldə olunmayıb. Qanuni qərarın icra edilməməsi, eyni zamanda sosial yardımın bu səbəblə rədd olunması ailənin hüquqlarının ciddi şəkildə pozulmasıdır.

Haşiyə: Dövlətin qəbul etdiyi qanunlar yalnız kağız üzərində qalarsa, vətəndaşların ümidləri də orada ölür. Əgər bir ana illərlə aliment ala bilmirsə, uşağı soyuq divarlar arasında böyüyürsə, biz necə sosial ədalətdən danışa bilərik? Ədalət bir nəfərin yox, hər kəsin haqqıdır!