İri qabaritli su ötürücü turbalarda açılan deşiklər nəticəsində minlərlə ton su boş sahələrə axır, idarə rəhbərlərinin səhlənkarlığı qiymət artımlarına əsas göstərilir.

Şəmkir və Şabran rayonlarından keçən iri qabaritli su ötürücü turbalarda açılan deşiklərdən tonlarla içməli su boş sahələrə axaraq israf edilir. Bu israf qarşısını almayan idarə və müəssisələr isə Tarif Şurasına qiymətlərin artırılması təklifini verərək səhlənkarlıqlarının nəticəsini dövlət büdcəsi əvəzinə vətəndaşın cibindən çıxarmağa çalışırlar.

Ekspertlərin sözlərinə görə, insan həyatı üçün həyati əhəmiyyət daşıyan suyun belə israfı həm ekoloji, həm də sosial böhrana yol açır. Dünyanın inkişaf etmiş ölkələrində su, qaz və işıq kimi resursların qiyməti nəzarətdə saxlanılır və israfın qarşısı alınır. Azərbaycanda isə bəzi idarə rəhbərlərinin səriştəsiz fəaliyyətləri hər il vətəndaşların yükünü artırır.

Rəsmi izahatlarda qiymət artımlarının səbəbi daşınma xərclərinin yüksəlməsi göstərilsə də, tonlarla suyun boş sahələrə axması, bu xərclərin birbaşa vətəndaşın cibinə yüklənməsinə səbəb olur. Belə səhlənkarlığın qarşısı alınmasa, gələcəkdə həm ekoloji fəsadlar, həm də vətəndaşın maliyyə yükü daha da artacaq.

İstifadəçilər və mütəxəssislər su infrastrukturlarının müasir standartlara uyğun təmir edilməsini və israfın qarşısının alınmasını tələb edirlər. Dövlətin və vətəndaşın gələcəyini təhlükəyə atan bu səhlənkarlıq dərhal araşdırılmalı və məsul şəxslər qanun qarşısında cavab verməlidir.