Zaqatala rayonunda məktəblilərin dərsə davamiyyətinə nəzarətlə bağlı ciddi suallar yaranıb. Redaksiyamıza təqdim olunan videogörüntülər rayonun təhsil sistemində davamiyyət məsələsinin nə dərəcədə nəzarətdə saxlanıldığının araşdırılması zərurətini gündəmə gətirir.

Görüntülərdə məktəbli yaşında olduğu ehtimal edilən bir şəxsin təmir sexinə daxil olduğu görünür. Məlumatı təqdim edən şəxslərin iddiasına görə, həmin uşaq dərsə getmək əvəzinə sexdə çalışır.

Ən təəccüblü məqam isə budur ki, həmin şəxsin hansı məktəbin şagirdi olduğu hələ də məlum deyil. Onun həqiqətən dərs saatlarında sexdə işləyib-işləmədiyi, təhsil aldığı müəssisə və davamiyyət vəziyyəti araşdırılmalıdır.

Ortaya ciddi sual çıxır: Əgər məktəbli dərs saatlarında təhsil müəssisəsindən kənarda əmək fəaliyyəti ilə məşğuldursa, məktəb rəhbərliyi bundan xəbərdardırmı? Xəbərdardırsa, hansı tədbirləri görüb? Xəbərdar deyilsə, şagirdlərin davamiyyətinə nəzarət hansı səviyyədə təşkil olunur?

Zaqatala rayonu üzrə təhsil sektoruna yeni təyin olunan Mehparə Mirzəyevanın qarşısında da cavablandırılmalı suallar dayanır.

Rayonun təhsil müəssisələrində davamiyyətlə bağlı sonuncu monitorinq nə zaman keçirilib? Dərsdən yayınan uşaqların müəyyənləşdirilməsi istiqamətində hansı tədbirlər görülür?

Paytaxtdan redaksiyaya təqdim olunan belə bir məlumatın rayonun təhsil strukturları tərəfindən araşdırılıb-araşdırılmadığı da məlum deyil. Təhsil sektorunun vəzifəsi yalnız kabinetlərdə keçirilən müşavirələrdən, hesabatlardan və formal tədbirlərdən ibarət ola bilməz.

Təhsil sahəsində rəhbər vəzifə daşıyan şəxslərin əsas məsuliyyətlərindən biri məktəblərdə tədrisin təşkili, davamiyyətə nəzarət və uşaqların təhsildən yayınmasının qarşısının alınması istiqamətində işlərin əlaqələndirilməsidir.

Əgər uşaqlar dərs saatlarında məktəb partası arxasında deyil, müxtəlif sexlərdə və iş yerlərində olurlarsa, bu, təkcə bir ailənin deyil, bütövlükdə aidiyyəti qurumların diqqət yetirməli olduğu məsələdir.

Burada söhbət yalnız davamiyyətdən getmir. Məktəbli yaşında olan uşaqların əmək fəaliyyətinə cəlb edilməsi ehtimalı onların təhlükəsizliyi və təhsil hüquqları baxımından ayrıca qiymətləndirilməlidir.

Zaqatala Təhsil Sektoru bu məsələyə aydınlıq gətirməlidir.

Videodakı şəxsin hansı məktəbin şagirdi olduğu, onun dərsə davamiyyəti, sexdə hansı səbəbdən olduğu və mümkün əmək fəaliyyətinin qanuniliyi müəyyənləşdirilməlidir.

Şəki-Zaqatala Regional Təhsil İdarəsinin rəhbərliyi də məsələyə münasibət bildirməli, rayon məktəblərində davamiyyətə nəzarətin real vəziyyəti barədə ictimaiyyətə məlumat verməlidir.

Çünki bir şagirdin belə təhsildən kənarda qalması ehtimalı görməzdən gəlinəcək məsələ deyil.

Redaksiya səsləndirilən iddialarla bağlı Zaqatala Təhsil Sektorunun və Şəki-Zaqatala Regional Təhsil İdarəsinin mövqeyini dərc etməyə hazırdır.