Prezident İlham Əliyevin İtaliya Prezidenti Sercio Mattarellanın, İtaliya Nazirlər Şurasının Sədri Mario Draqinin və "The European House - Ambrosetti" beyin mərkəzinin dəvəti ilə Çernobbio şəhərində keçirilən beynəlxalq forumda əsas qonaq qismində iştirakı, həmçinin dövlətimizin başçısının forumun plenar iclasında "Enerji təhlükəsizliyinin təmin olunmasında Azərbaycanın rolu" mövzusunda çıxış etməsi ölkəmizə və onun liderinə olan böyük hörmətin nümunəsidir.


Bunu bakunews.az trend-ə istinaden siyasi ekspert Elçin Mirzəbəyli deyib.

"Qeyd edim ki, 1975-ci ildən etibarən hər il keçirilən Ambrosetti Forumu dünyanın ən nüfuzlu beynəlxalq iqtisadi platformalarından biri hesab olunur və ətrafına topladığı çoxsaylı ölkələrin liderləri, dövlət və hökumət nümayəndələri, Nobel mükafatı laureatları, eləcə də elm və iş adamlarının say və nüfuz göstəricilərinə görə digərlərindən fərqlənir. Rəcəb Tayyib Ərdoğan, Şimon Perez, Co Bayden, Corc Şults, Dik Çeyni, Joze Barrozo, Felipe Qonsales, Alen Jüppe, Henri Kissincer, Silvio Berluskoni kimi nüfuzlu siyasətçilərin, Bill Qeyts və Cimmi Uels böyük adamlarının və digərlərinin son bir neçə ildə forumun işinə qatılaraq, burada ən müxtəlif mövzularda məruzələrlə çıxış etmələri sözügedən platformasının qlobal əhəmiyyətindən xəbər verir.

Onu da bildirim ki, qlobal iqtisadi böhran və geoiqtisadi kataklizmlər fonunda baş tutan Forumun bu il müzakirəyə çıxarılan mövzuları diqqəti xüsusilə kəsb edir", - ekspert qeyd edib.

O əlavə edib ki, "Dünya, Avropa və İtaliyaya baxış" və "Rəqabətli strategiyalar üçün bu günün və sabahın ssenarisi" mövzusunda aparılan müzakirələrin məqsədi mövcud qlobal reallıqlar çərçivəsində daha təhlükəsiz gələcəyin proqnozlaşdırılmasıdır.

"Prezident İlham Əliyevin Forumda "Enerji təhlükəsizliyinin təmin olunmasında Azərbaycanın rolu" mövzusunda çıxış erməsi isə ölkəmizin enerji siyasətinə və bu sahədə əldə etdiyi çoxillik təcrübəyə olan marağın göstəricidir. Dövlət başçısının çıxışından da göründüyü kimi, söhbət təkcə Avropanın enerji təhlükəsizliyindən deyil, enerji sahəsində daha qlobal miqyasda mövcud olan və gözlənilən problemlərin həllindən gedir. Azərbaycanın enerji resursları böyük olmasa da, ölkəmizin bu sahədə yürütdüyü siyasətin qlobal miqyasda bir model, platforma olaraq əhəmiyyətindən gedir. Bu xüsusda, Azərbaycanın Avropa İttifaqı ilə enerji sahəsində rəsmi olaraq başlatdığı dialoqu və bu dialoqun enerji bazarının bütün seqmentlərini əhatə etdiyini vurğulamağı məqsədəuyğun hesab edirəm. Qənaətimə görə, bu gün Azərbaycan Prezident İlham Əliyevin liderliyi ilə Avropanın və dünyanın enerji təhlükəsizliyinə münasibətdə bütün təhlükələri önləyə biləcək, çoxşaxəli baxış bucağı ortaya qoyur və əməkdaşlığın yeni prioritetlərini müəyyənləşdirir", - E.Mirzəbəyli vurğulayıb.

bakunews.az