Qaliblər mühakimə edilmir. Bəs mühakimə etməli olanlar necə? Hər şey üçünmü gec qalmışıq? Onları harda itirdik? Vaxtında vermədiyimiz dəyərlər indimi qapımıza gəlib? Bilmədikmi ki, görüb götürmədiklərimiz bir gün ipi boynumuza salmaq üçün geri dönəcək? Məsxərə ilə özümüzə “dözümlü xalqıq. Buna da dözərik” dedikdə anlamırdıqmı ki, milli iradəyə zərbə vururuq? Hər cür dəyəri görüb özümüzdən sonra gələnlərə ötürməməklə cılız bir gələcəyi bizlər yetişdirmədikmi? Zamanında övladlarımız üçün ayırmağa ərindiyimiz vaxtın bizləri nələrdən ayıra biləcəyini bilmədikmi? Mövzu o qədər cığırından çıxıb ki, çıxış yolu tapmağın özü artıq bacarıq tələb edir. Küçümsədiyimiz 10 qəpiklə başa gələ bilməyən bizlər hələ də heç kimə lazım olmayan yersiz eqolarımızın müdafiəsi üçün məşğuluq. Yumalanaraq üstümüzə gələn, dağın təpəsindəki o “kiçik” daşdan xəbərimiz yoxdur. Başımıza düşmədən də olacağına inanmıram.

Elə isə gəlin hər şeydən əvvəl “inkişaf” adı altında millətə həzm etdirilən 10 qəpiyin kimliyini ortaya qoyaq. Onun dəyərini dəyərsiz göstərib qılınc oynadanlardan və küncə sıxışdırılmaqda olan, dövləti ayaqda tutan ən dəyərli şeydən, vətəndaşdan danışaq. Danışaq bu gün qarşımıza çıxan “10 qəpik qalxıb, özünüzə nə əl qatmısınız?” sualıyla o sualın altında əzilənlərdən, hər boşluqda baş rola keçən “taksi” fəaliyyətindən, dəyişdirilməyə çalışılan avtomobil parklarından, müzakirə edilmədən qaldırılan suni qiymətlərdən, benzin və dizelin insanların həyatındakı əvəzsiz rolundan, yumurta qədər dəyər görməyən xalqın, talan edilən mənəvi dünyasından, gələcəyə doğru planlaşdırılmış maliyyə qasırğalarından…

Hörmətli heç bir tərifə sığmayan Tarif Şurası! Hazırsınızmı veriləcək bütün suallara vicdanla doğru cavab verməyə? Havanın çirkləndirilməsini bəhanə edib dizelə gətirdiyiniz 20 qəpik artımın ərzaq, daşıma və digər sahələrdə devrilən domino daşı effekti yaradacağını bilmirdinizmi? Nəyə lazım idi işsizlikdən əziyyət çəkən xalqın çiyinlərinə bir yük daha qoymaq? Silsilə artımlarla nəyə nail olmaq istəyirsiniz? Əgər doğrudan da 10 qəpik elə də böyük vəsait deyildisə, niyə ölkənin talehiylə oynaya biləcək dizel və benzinə 10 qəpik endirim etmədiniz? Axı zamanında artıma gedərkən yeni zavodun qurulduğunu, gələcəkdə daha keyfiyyətli yanacaqla xalqı təmin edəcəyinizi, müvəqqəti xaricdən Aİ-92 benzin və dizel idxal edəcəyinizi, buna görə qiymət artımına gedildiyini qeyd etmişdiniz. İşlər başa çatdıqda isə qiymətlərin xalq üçün yenidən daha münasib olacağına təminat vermişdiniz. Nə oldu? Nə dəyişdi ki, sözünüzdən döndünüz? Zavod ərsəyə gəldiyi zaman niyə Avropa ilə müqayisələrə başladınız? Əbu Turxan demiş, mərdin ibadət vaxtı namərdə qılınc vermək kimə lazım idi? 44 günə Azərbaycan tarixinə şanlı səhifə yazan qalib sərkərdəyə və onun arxasında dayanan qalib (Qazi,Şəhid) ordusuna, xalqına kimlər savaş açmaq istəyir? Bilirsinizsə deyin, hörmətli şura üzvləri. Deyin ki, bu xalq da dostu-düşməni tanısın. Çünki yalnız sağlam milli şüura malik olan xalq öz haqqını qoruya bilər.
Sonda isə fikrimi elə Əbu Turxanın sözləri ilə tamamlamaq istəyirəm. Böyük siyasilər inqilab vasitəsilə islahatlar yox, islahatlar vasitəsilə inqilab edənlərdir. UNUTMAYIN…


İMZA: Altunaz Süleymanoğlu