Ailəmiz beş nəfərdən ibarətdir. Amma Xalq artisti, görkəmli muğam ustadı Alim Qasımov avazına qulaq asdığım anda məndən ailəmizin neçə nəfərdən ibarət olduğunu soruşsalar, şübhəsiz, altı olduğunu deyərəm. Alim avazı, bəli, o avaz ki, evimizin bir parçası, ruhumuzun isə ən ali zirvəsidir.

Yaxşı yadımdadır, illər öncə Alim Qasımovun sazı bizə hədiyyə olunanda atam onu alıb ehmalca evimizin ən yüksək hesab etdiyimiz nöqtəsinə, "Qurani-Kərim"in yanına qoymuşdu. Uşaq olsam da, elə o andaca Alim sənətinin - muğamın müqəddəsliyinin fərqinə varmışdım.

Bu gün Alim Qasımovun doğum günüdür. Tez-tez tarix və şəxsiyyət məfhumlarından danışırlar. Elə doğum günündə bunu özümə borc bilərək demək istəyirəm ki, Alim tanrının və tarixin bizə bəxş etdiyi ən əziz şəxsiyyətlərdəndir. O, illərdir evimizin ən əziz parçası və ən hörmətli qonağıdır. Bu dəfə isə biz müqəddəs avazın sahibi ilə həmsöhbətik.

Bu gün 65 yaşı tamam olan Xalq artisti, səsi və sənəti ilə hər kəsin sevimlisinə çevrilən sənətkar Alim Qasımovun "Report" a müsahibəsini təqdim edirik:

- Alim Qasımovun həyatından kitab yazılsaydı, həmin ömür kitabının adı nə olardı?

- Hər işim düzələcək - mən öləndən sonra olardı (gülümsəyir).

- Niyə söhbətimizə ölümdən danışmaqla başladınız?

- Ona görə ki, qızım, məni tanıyanlar bilir. Yəqin ki, yazını oxuyanlar da nə demək istədiyimi başa düşəcək.


- 30 il sonra Şuşada, Cıdır düzündə qızınız Fərqanə xanımla “Xarıbülbül” festivalında ifa etdiniz. Hansı hissləri keçirdiniz?

- 30 il sonra Şuşada ifa etmək hər şeydən öncə olduqca məsuliyyətli idi. “Xarıbülbül” festivalında iştirak edəndə böyük qürur və sevinc hissi yaşadım. Cıdır düzündə elə əlvan, müqəddəs bir yerdə ifa etmək, doğrudan da insanı çox qürurlandırır. Orada kövrəlməmək, o gözəlliklərə heyran olmamaq mümkün deyil. Elə o zaman o gözəlliklərə baxıb söylədim ki, Cıdır düzü əlvandır, Qarabağ Azərbaycandır!

- Müsahibələrinizin birində gücünüz çatdığı qədər tamahınızla mübarizə apardığınızı bildirmisiniz. Sizcə, günümüzdə tamahı ilə baş edə bilməyənlər çoxdur?

- Bəli, hər zaman tamahımla mübarizə aparmağa çalışmışam. Bu, indi də belədir. Nə deyim, vallah, mən öz üzərimə düşəni etməyə çalışıram. Amma bəli, tamahı ilə mübarizə aparanlar da var, aparmayanlar da.

- “Xatirədir” mahnınız ən çox sevilən ifalarınızdandır. Dinləyicilər sanki bu üsulla öz xatirələrini tərpədirlər. Alim Qasımovun yaddaşında hansı xoş, yaxud kədərli xatirələr var?

- Həyatım başdan sonacan bir xatirədir. Konsertlərim, konsertdə iştirak edənlərin üzündəki təbəssüm, sonda bütün zalın necə ürəkdən alqışlamasını görmək elə mənim ən xoş xatirələrimdəndir. "Xatirədir" mahnısından söz açmışkən, mən onu təqdim etdikdən, insanların reaksiyasını gördükdən sonra oturub mahnıya bir dinləyici kimi yenidən qulaq asdım. Ondan sonra "Xatirədir”in fəlsəfəsini anladım. Ona qədər mən də anlamamışdım.

-Sizin kimi yerdə bardaş qurub, ifa edənlər yoxdur. Necə oldu ki, bu formada ifa etməyə başladınız?

- Bardaş qurub ifa etmək planımız yox idi. Ümumiyyətlə, həyatım plan üzərində qurulmayıb. Hər şey bədahətən baş verib. Bir dəfə bizi Belçikaya konsertə dəvət etmişdilər. Məşq zamanı gördüm ki, səhnəyə stul qoyulmayıb. Onlar stul gətirənə qədər biz yerdə oturduq. Xoşuma gəldi, o konserti də elə oturan yerdə verdik. Daha sonralar da elə oturub oxumağa başladıq.

- “Yaxşı ki, Azərbaycanda yaşamışam. Çünki bu eşqi, bu halı ola bilsin ki, qəriblikdə tuta bilməzdim”, - müsahibənizdəndir, görünür, həm də Vətən aşiqisiniz...

- Doğrudur, Azərbaycandan kənarda yaşamaq istəməmişəm. Çünki həmişə düşünmüşəm ki, bu eşqi qəriblikdə yaşaya bilməzdim. Vətəni sevmək, ananı sevməkdir. Ona görə də Vətən anamız qədər doğmadır.

- Yaxın zamanlarda konsert verməyi düşünürsünüz?

- Bəli, amma tarixi hələ məlum deyil.

- Bəs Qarabağda necə, orada konsert verməklə bağlı planınız var?

- Bəli, düşünürük, Allahın izni ilə işğaldan azad edilmiş torpaqlarımızın hər birində konsert verəcəyik.


- Vaxtilə Alim muğam mərkəzi fəaliyyət göstərirdi, daha sonra təmir məqsədi ilə fəaliyyəti dayandırıldı, mərkəzin aqibəti necə oldu?

- İnşallah, sözgedən muğam mərkəzinin yenidən fəaliyyət göstərməsi ilə bağlı ümidim var. Allahın izni ilə, o binadan yenidən gözəl bir məktəb alınacaq. İnanıram ki, bu işdə xalqımızın və dövlətimiz də mənə dəstək olacaq.

- Alim Qasımov doğum günündə bundan sonrakı həyatı üçün özünə nə arzu edir?

- Doğum günümdə ailəmə, doğmalarıma, əzizlərimə uzun, sağlam ömür diləyirəm. Hər kəsə imanlı olmağı arzulayıram. Arzu edirəm ki, xalqımız hər zaman firəvan, sülh içində yaşasın.

- bakunews.az report-a istinadən İnformasiya Agentliyi adından doğum gününüzü təbrik edir, sizə uzun ömür, möhkəm cansağlığı və fəaliyyətinizdə uğurlar arzulayırıq.

- Diqqətiniz üçün minnətdaram. Təşəkkür edirəm!

bakunews.az