Martın 19-da Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunda təşkil olunan elmi sessiyada Xalq şairinin zəngin irsi geniş şəkildə müzakirə olunub. Tədbirdə həmçinin Mərkəzi Elmi Kitabxana (MEK) tərəfindən hazırlanmış “Səməd Vurğun elektron bazası” ictimaiyyətə təqdim edilib.
Layihə barədə məlumat verən MEK-in direktoru, texnika elmləri doktoru Hüseyn Hüseynov bildirib ki, əsas məqsəd böyük sənətkarın yaradıcılığını daha geniş auditoriyaya çatdırmaqdır. Elektron resursda şairin avtobioqrafiyası, əsərləri, yaradıcılığına dair materiallar, müxtəlif illərdə nəşr olunmuş kitablar və onun haqqında elmi ədəbiyyatlar toplanıb. Bununla yanaşı, platformada foto və video materiallar, şeirlərinə bəstələnmiş mahnılar və film-tamaşalar da yer alır.