Daxili İşlər Nazirliyinin Baş Narkotiklərlə Mübarizə İdarəsinin (BNMİ) əməkdaşları tərəfindən həyata keçirilən növbəti əməliyyat nəticəsində külli miqdarda narkotik vasitə qanunsuz dövriyyədən çıxarılıb.

Əməliyyat tədbirləri zamanı qaçaqmalçılıq yolu ilə ölkə ərazisinə narkotik vasitələrin gətirilməsi ilə məşğul olan bir qrup şəxsin cinayət fəaliyyəti ifşa edilib. Astara rayonu və Qaradağ rayonu ərazilərində keçirilən tədbirlər nəticəsində əvvəllər qəsdən adam öldürmə və oğurluq cinayətlərinə görə məhkum olunmuş Əli Məmmədov, Rəvan Hüseynov və İlkin Əhmədov saxlanılıblar.

Bakunews.az xəbər verir ki, Saxlanılan şəxslərdən ümumilikdə 43 kiloqram 300 qram tərkibinə zərərli maddələr əlavə edilmiş marixuana aşkarlanaraq götürülüb. Araşdırmalar zamanı müəyyən edilib ki, onlar şəxsiyyəti istintaqla araşdırılan İran vətəndaşları ilə cinayət əlaqəsinə girərək narkotik vasitələri sərhədyanı ərazilərdən əldə edib, maddi qazanc müqabilində müxtəlif ünvanlara yerləşdirməyi planlaşdırıblar.

Faktla bağlı cinayət işi başlanılıb. Saxlanılan şəxslər barəsində məhkəmənin qərarı ilə həbs qətimkan tədbiri seçilib. İstintaq tədbirləri davam etdirilir.

Hüquq-mühafizə orqanları narkotik vasitələrin qanunsuz dövriyyəsinə qarşı mübarizəni qətiyyətlə davam etdirdiyini bildirir.