“Ölkədəki mebel bazarının 70 faizinə nəzarət edən şirkətin istər ixrac-idxal qaydalarını pozması, istərsə də qüsurlu mal satması dəfələrlə ictimailəşdirilib, hətta cəzalar tətbiq edilib. Lakin görünən odur ki, cəzalar “Embawood” MMC-nin fəaliyyətində müsbətə doğru dəyişiklik yaratmayıb.”
Bunlar bu günlərdə “Embawood” MMC-nin fəaliyyəti ilə bağlı elektron mediada yayılmış məlumatlardandı. Məlumatlarda həmçinin qeyd edilir ki, “sifarişlərin müqavilədə nəzərdə tutulan vaxtda və formada tam icra edilməsi müştərilərə vəd edilən səviyyədə deyil. Bir çox hallarda isə ünvana çatdırılan mebellərin keyfiyyəti reklam olunduğu, hətta vitirindəkindən qat-qat aşağı, materialları fərqli olur.”
Bunlar vətəndaşların “Embawood” mebellərindən olan narazılıqlarıdır. Buna baxmayaraq sözügedən şirkətin paytaxt daxil ölkənin hər yerində böyük mebel mağazaları fəaliyyət göstərir. “Embawood” MMC həm də bir çox dövlət qurumlarına da mebel satır. Aktualinfo.org dövlət satınalmalarının internet portalı üzərindən “Embawood” MMC-nin son illər hansı dövlət qurumları ilə işbirliyində olduğunu araşdırıb.
Ədliyyə Nazirliyi tərəfindən Azərbaycan Respublikası Bakı Hərbi Məhkəməsi üçün ofis mebellərinin satın alınması üzrə 87.799,08 manat məbləğində müqavilə bağlanılması 09.04.2025-ci ildə dərc edib.
“Gəncə Şəhər Birləşmiş Xəstəxanası” publik hüquqi şəxsi tərəfindən bərk invertarın alınması üzrə 119.240,18 manat məbləğində müqavilə bağlanılması 14.02.2025-ci ildə dərc edib.
Ədliyyə Nazirliyi tərəfindən maliyyə təminatı həyata keçirilən məhkəmələrə mebel və digər inventarların satınalınması üzrə 88.914,18 manat məbləğində müqavilə bağlanılması 29.12.2024-cü ildə dərc edib.
İqtisadiyyat Nazirliyinin İqtisadi Elmi Tədqiqat İnstitutu publik hüquqi şəxsi tərəfindən mebel avadanlığının satın alınması üzrə 29.972 manat məbləğində müqavilə bağlanılması 29.12.2024-cü ildə dərc edib.
Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidməti tərəfindən mebel və inventarların satın alınması üzrə 106.858,44 manat məbləğində müqavilə bağlanılması 28.12.2024-cü ildə dərc edib.
Gəncə Apellyasiya Məhkəməsi tərəfindən inventarlarin satın alınması üzrə 2.998,38 manat məbləğində müqavilə bağlanılması 16.12.2024-cü ildə dərc edib.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən bir sıra “ASAN xidmət” mərkəzlərində tikili və avadanlıqların cari təmiri işlərinin satınalınması üzrə 1.184.586,45 manat məbləğində müqavilə bağlanılması 04.11.2024-cü ildə dərc edib.
“İnnovasiya və Rəqəmsal İnkişaf Agentliyi” publik hüquqi şəxsi tərəfindən ofis mebellərinin satın alınması üzrə 148.749,62 manat məbləğində müqavilə bağlanılması 06.09.2024-cü ildə dərc edib.
İqtisadiyyat Nazirliyi yanında Dövlət Vergi Xidməti tərəfindən ebel avadanlıqlarının satın alınması üzrə 164.089,62 manat məbləğində müqavilə bağlanılması 22.07.2024-cü ildə dərc edib.
Göründüyü kimi “Embawood” MMC yalnız 2024-cü ildə dövlət qurumları ilə 1 934 205 manat məbləğində satınalma müqaviləsi bağlayıb. Elektron mediada yayılan məlumatlarda qeyd olunur ki, “Embawood” MMC-nin məhsulları illər əvvəl malik olduğu keyfiyyəti itirib. Bu gün 2004-cü ildə şirkətə verilən İSO 9001:2000 Beynəlxalq “Keyfiyyətin İdarə Edilməsi Sistemi” üzrə sertifikata yenidən baxılmasına ehtiyac yaranıb. Yeri gəlmişkən, həmin sertifikatın etibarlılıq müddəti 3 ildir. “Embawood” həmin vaxtdan sonra yenidən sertifikatlaşdırma auditi keçirməyib. MMC-nin 2015-ci ildə aldığı İSO 14001 ..2004 Beynəlxalq “Keyfiyyətin İdarə Edilməsi Sistemi” üzrə sertifikatın da müddəti (3 illikdir) başa çatıb.
Burada ortaya suallar çıxır. Sertifikatının müddəti bitmiş şirkət dövlət satınalmalarında necə iştirak edə bilir? Bu serifikatlar şirkətin istehsal etdiyi malların keyfiyyətinə zəmanət üçün verilir. Amma Göründüyü kimi, Ədliyyə Nazirliyi də, Dövlət Vergi Xidməti də, Suların İstifadəsinə və Mühafizəsinə Dövlət Nəzarəti Xidməti də, Gəncə şəhər Birləşmiş Xəstəxanası, İnnovasiya və Rəqəmsal İnkişaf Agentliyi də MMC-nin sertifikatlarına sadəcə göz yumub. Bu isə çox güman ki, “Embawood”un sahibinin geniş əlaqələri və nüfuzu ilə bağlıdır.
Qeyd edək ki, rəsmi olaraq, Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “EMBAWOOD” (VÖEN: 6400009481) Məhdud Məsuliyyətli Cəmiyyətinin 08.05.2002-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 3750.00 manat olanMMC-nin hüquqi ünvanının, BAKI ŞƏHƏRİ YASAMAL RAYONU, B.BAĞIROVA, ev 15A, QAPI 1, qanuni təmsilçisi kimi isə Abbasov Elşad İnşalla oğlu qeyd olunub.
Reyestr məlumatlarına edilmiş dəyişikliklərdə MMC-nin ilk hüquqi ünvanı MASALLI RAYONU, MASALLI ŞƏHƏRİ, ŞƏHRYAR, ev 2 göstərilib. 2.18.2009-cu ildən 05.27.2010-cu ilə qədər MMC-yə qanuni təmsilçisi Məmmədov Məşhur Şahbaz oğlu olub. Qeyd edək ki, Məmmədov Məşhur Şahbaz oğlu 70 saylı Masallı şəhər seçki dairəsindən Azərbaycan Respublikası Milli Məclisinin VI və VII çağırış deputatı seçilmişdir.

Aktualinfo.org