Gəncə Şəhər Birləşmiş Xəstəxanasının tabeliyində fəaliyyət göstərən Akademik Zülfüqar Məmmədov adına 3 nömrəli şəhər xəstəxanasının baş həkimi Turanə Rüstəmovanın fəaliyyəti ilə bağlı redaksiyaya ciddi iddialar daxil olub.

Məlumatlarda bildirilir ki, 2025-ci ildə sözügedən tibb müəssisəsinə baş həkim təyin olunan Turanə Rüstəmovanın idarəçilik fəaliyyəti xəstəxana əməkdaşları arasında narazılığa səbəb olub. İddialara görə, müəssisədə bəzi şöbə müdirləri və həkimlərdən müxtəlif adlar altında aylıq ödənişlər tələb olunur.

Redaksiyaya təqdim edilən məlumatlarda xüsusilə “fond pulu” adı altında həkimlərdən mütəmadi şəkildə vəsait toplandığı iddia edilir. Bu vəsaitlərin hansı hüquqi əsasla yığıldığı, harada uçota alındığı və hansı məqsədlə xərcləndiyi isə açıq qalır.

Daha ciddi iddialardan biri xəstəxanaya ayrılan dərman preparatlarının taleyi ilə bağlıdır. Mənbələrin sözlərinə görə, dövlət tibb müəssisəsi üçün nəzərdə tutulan bəzi dərman vasitələrinin xəstəxanadan kənara çıxarılaraq apteklərə satıldığı iddia olunur. Bu məlumat təsdiqini taparsa, söhbət artıq yalnız inzibati pozuntudan deyil, dövlət əmlakının və səhiyyə resurslarının istifadəsi ilə bağlı ciddi hüquqi məsələlərdən gedə bilər.

Digər diqqətçəkən məqam təsərrüfat şöbəsinin əməkdaşları ilə bağlıdır. İddialara əsasən, həmin şöbədə adı işçi kimi rəsmiləşdirilən bəzi şəxslər faktiki olaraq işə gəlmirlər. Bununla yanaşı, həmin əməkdaşlara məxsus əməkhaqqı kartlarının baş həkimin nəzarətində olduğu barədə də məlumatlar səsləndirilir.

Redaksiyaya verilən məlumatlarda xəstəxanada ən adi dəftərxana ləvazimatlarının belə çatışmadığı bildirilir. Laborator analizlərin nəticələrinin adətən A4 formatlı kağızda xəstələrə təqdim edilməli olduğu halda, xəstəxanada kağız çatışmazlığı səbəbindən vətəndaşların nəticələri telefonla çəkməyə və ya elektron sistem üzərindən əldə etməyə məcbur qaldıqları deyilir.

Bu isə başqa bir sualı gündəmə gətirir: xəstəxananın dəftərxana və təsərrüfat təminatı üçün ayrılan vəsaitlər hara xərclənir?

Məlumatlarda əlcək, süpürgə, ağ xalat, müxtəlif təsərrüfat malları, avadanlıqlar və digər mal-materialların satın alınması üçün müvafiq satınalmaların həyata keçirildiyi, lakin həmin məhsulların bir hissəsinin xəstəxanada faktiki olaraq görünmədiyi iddia olunur.

Əgər satınalma sənədlərində mal və avadanlıqların xəstəxanaya təhvil verildiyi göstərilirsə, onların faktiki mövcudluğunun inventarizasiya yolu ilə yoxlanılması vacibdir. Hansı şirkətlərdən nə qədər məhsul alınıb? Bunun üçün nə qədər dövlət vəsaiti xərclənib? Malların təhvil-təslim aktları varmı? Hazırda həmin mal-materiallar xəstəxananın anbarında mövcuddurmu?

Ortaya çıxan iddialar kifayət qədər ağırdır və onların hər biri TƏBİB, Gəncə Şəhər Birləşmiş Xəstəxanası, eləcə də zərurət yaranacağı təqdirdə hüquq-mühafizə orqanları tərəfindən ayrıca araşdırılmalıdır.

Xüsusilə əməkdaşlardan qeyri-rəsmi vəsaitlərin toplanması, dövlət hesabına alınmış dərman və avadanlıqların taleyi, faktiki işə çıxmayan şəxslərə əməkhaqqı ödənilməsi və əməkhaqqı kartlarının üçüncü şəxslərin nəzarətində saxlanılması barədə iddialar cavabsız buraxıla biləcək məsələlər deyil.

BakuNews.az məsələ ilə bağlı qarşı tərəfin – baş həkim Turanə Rüstəmovanın, Gəncə Şəhər Birləşmiş Xəstəxanasının və TƏBİB-in mövqeyini dərc etməyə hazırdır.

Redaksiyamız sözügedən xəstəxanada aparılan satınalmalar, dərman təminatı, əməkhaqqı ödənişləri və təsərrüfat xərcləri ilə bağlı məlumatları araşdıraraq mövzuya daha geniş şəkildə qayıdacaq.

Ofeliya Davudqızı