Bakının Nəsimi rayonunda, Ağadadaş Qurbanov küçəsi, 23 ünvanında yaşayan sakinlər evlərinin qarşısındakı dəmir hasarın sökülməsini tələb edirlər. Onlar bildirirlər ki, istinad etdikləri məhkəmə qərarları qanuni qüvvəyə minsə də, problem hələ də həll olunmayıb.

Bu barədə sakinlər Gununsesi.info-ya müraciətlərində bildiriblər.

Şikayətçilərin sözlərinə görə, rayon rəhbərliyində dəyişiklik olsa da, dərdlərini birbaşa icra başçısına çatdıra bilmirlər.

Sakinlər yeni icra başçısının da qəbuluna düşməkdə çətinlik çəkdiklərini deyir və Prezidentə müraciət etməyə hazırlaşırlar.

Həmin ünvanda yaşayan Ramin Əhməd oğlu Ağayev və Cavid İsmayıl oğlu İsmayılov Nəsimi Rayon İcra Hakimiyyətinin başçısına müraciət ediblər. Onların sözlərinə görə, yaşadıqları ev paylı mülkiyyətlərindədir və küçə boyunca çəkilmiş dəmir hasar qanunsuzdur.

Müraciətdə qeyd olunur ki, əvvəlki cavablarda hasarın mövcudluğu ərazinin Bakı Şəhər İcra Hakimiyyətinin sərəncamı əsasında “VİALON” tikinti şirkətinə icarəyə verilməsi ilə izah edilib. Şirkət mediada yayılan məlumatlarda sabiq deputat Əsabil Qasımovla əlaqələndirilir.

Şikayətçilər bildirirlər ki, ərazinin sərəncamla ayrılması və torpağın icarəyə verilməsi ilə bağlı sənədlər onların evinin yerləşdiyi hissəyə münasibətdə məhkəmə qaydasında etibarsız hesab edilib. Onların sözlərinə görə, məhkəmə qərarları qanuni qüvvəyə minib və qərarların surətləri icra hakimiyyətinə ünvanladıqları müraciətə əlavə olunub.

Sakinlər hesab edirlər ki, hasarın saxlanılması üçün göstərilən hüquqi əsas onların mülkiyyətinə aid hissədə aradan qalxıbsa, onun yerində qalması izah olunmalıdır. Onlar aidiyyəti qurumlardan məhkəmə qərarlarının nəzərə alınmasını və hasarın sökülməsi məsələsinin həllini istəyirlər. Məhkəmə aktlarının məzmunu ilə bağlı məlumatlar sakinlərin müraciətinə və dərc olunmuş xəbərlərə əsaslanır.

Xatırladaq ki, Nəsimi rayonunda ötən ilin sonundan etibarən rəhbərlik dəyişikliyi baş verib. Prezident İlham Əliyevin 12 noyabr 2025-ci il tarixli sərəncamı ilə icra başçısı təyin edilən Elxan Oqtay oğlu İbrahimov cəmi 47 gün sonra – 29 dekabr 2025-ci ildə vəzifəsindən azad olunub. 9 fevral 2026-cı ildə isə Tahir Yaqub oğlu Budaqov Nəsimi Rayon İcra Hakimiyyətinin başçısı təyin edilib.

Sakinlər yeni rəhbərlikdən şikayətlərinin dinlənilməsini və məsələyə yerində baxılmasını gözləyirlər. Lakin onların bildirdiyinə görə, yeni başçının da qəbuluna düşmək çətindir və problem barədə ona birbaşa məlumat verə bilmirlər.

Şikayətçilər iddia edirlər ki, başçının ətrafındakı bəzi məmurlar məsələni ondan gizlədir, müraciətin mahiyyətini rəhbərliyə tam çatdırmırlar. Bu iddianın aydınlaşdırılması üçün icra hakimiyyətinin də mövqeyi vacibdir. Müraciət başçıya təqdim olunubmu və sakinlərin qəbulu üçün hansı addımlar atılıb?

Qəbula düşə bilmədiklərini deyən sakinlər hesab edirlər ki, rəhbərliyin dəyişməsi ilə problem öz-özünə həll olunmur. Onların müraciətinin araşdırılması, təqdim etdikləri məhkəmə qərarlarının nəzərə alınması və görüləcək tədbirlər barədə əsaslandırılmış cavab verilməsi vacibdir.

Sakinlər bildirirlər ki, məsələ yerli səviyyədə həllini tapmasa, məcburiyyət qarşısında Prezident İlham Əliyevə müraciət edəcəklər. Onlar ölkə başçısından məsələnin nəzarətə götürülməsini və aidiyyəti qurumların hərəkətə keçməsini istəyəcəklər.

Beləliklə, Nəsimi Rayon İcra Hakimiyyətinin qarşısında bir neçə sual dayanır:

Sakinlərin təqdim etdiklərini bildirdikləri məhkəmə qərarları niyə nəzərə alınmır?

Dəmir hasarın saxlanılması hansı hüquqi əsasla izah olunur?

Problemin həlli üçün hansı tədbirlər görüləcək?

Ağadadaş Qurbanov küçəsi, 23 ünvanında yaşayan sakinlər qəbul tarixi və şikayətlərinin həlli ilə bağlı konkret cavab gözləyirlər.

Gununsesi.info