Avropa İttifaqı Şurasının rəhbəri Şarl Mişelin vasitəçiliyi ilə Azərbaycan Prezidenti ilham Əliyevlə Ermənistan baş naziri Nikol Paşinyan arasında avqustun 31-də Brüsseldə növbəti görüş keçiriləcək.

Xatırladaq ki, iyulun sonunda Ermənistan Parlamentinin Xarici Əlaqələr Daimi Komitəsinin sədri Eduard Ağacanyan İrəvan və Bakı Ermənistan və Azərbaycan liderləri Nikol Paşinyan və İlham Əliyev arasında görüş keçirmək üçün danışıqlar apardığını bildirmişdi. Öz növbəsində Avropa İttifaqı Şurasının prezidenti Şarl Mişel bir neçə gün əvvəl Paşinyanla Əliyevin Brüsseldə yeni görüş keçirəcəklərini açıqlayıb. Qeyd edək ki, bu günə kimi, tərəflər Brüsseldə üç dəfə görüşüb – ötən ilin dekabrın 15-i, bu ilin aprelin 6-sı və sonuncu dəfə mayın 22-də.

Bu dəfəki Brüssel görüşündə hansı məsələlər müzakirə predmeti olacaq?

Beynəlxalq Münasibətlərin Təhlili Mərkəzinin rəhbəri Fərid Şəfiyevin fikrincə, Brüsseldə olacaq növbəti görüşdə Bakı sülh sazişi mətni üzərində işləmək üçün Ermənistandan konkret cavab tələb edəcək:"Gündəmdə olan əsas məsələ sülh sazişidir. Məlumatıma görə, Azərbaycan tərəfi avqustun 31-də olacaq Brüssel görüşündə sülh sazişinin mətni üzərində işləməyi tələb edəcək. Bununla bağlı əvvəllər təkliflərimiz verilib. İrəvan isə bu istiqamətdə olan hər bir məsələyə konkret olaraq cavab verməməyə çalışır. 31 avqust görüşündə isə Bakı konkret olaraq tələb edəcək ki, sülh sazişinin mətni üzərində işə konkret olaraq start verilsin. Bilirsiniz ki, sülh sazişi ideyası və bu istiqamətdə Azərbaycanın təqdim etdiyi 5 təklifi var. Paşinyan və digər erməni rəsmiləri də həmin 5 maddədən ibarət təklifə etiraz etmədiklərini bildiriblər. Ona görə Bakı tələb edəcək ki, artıq mətn üzərində işləməyə başlayaq. Əsas məsələ budur. Digər məsələlər, delimitasiya və kommunikasiyaların açılması isə iki ölkə arasında sülhün olub-olmayacağından asılıdır. Azərbaycan bu istiqamətdə İrəvandan konkret cavab gözləyir”.

bakunews.az