Xaçmaz rayon sakini Rəhmani Nəsirov ciddi iddia ilə çıxış edib. Onun sözlərinə görə, Xaçmaz Rayon Mərkəzi Xəstəxanasında (RMX) 10 oktyabr 2025-ci il tarixdə stasionar müalicə almasına baxmayaraq, ona məxsus əmək qabiliyyətsizlik vərəqəsi (bülleten) yalnız 11 oktyabr 2025-ci il tarixində açılıb.

Bu uyğunsuzluq nəticəsində Rəhmani Nəsirovun işlədiyi Su Ehtiyatları Agentliyinin Xaçmaz Su İstismarı İdarəsi tərəfindən əmək haqqı bu günədək — 6 fevral 2026-cı il tarixinə qədər ödənilməyib.

Şikayətçi bildirir ki, yaranmış vəziyyətin əsas səbəbkarı Xaçmaz RMX-nin baş həkimi Əhməd Əhmədovun səhlənkarlığıdır. Onun sözlərinə görə, bülletenlərin açılması və buna nəzarət birbaşa baş həkimin səlahiyyətindədir.

Rəhmani Nəsirov xəstəxanada çəkdiyi videogörüntüləri də redaksiyamıza təqdim edib. Həmin görüntülərdə baş həkim Əhməd Əhmədovun iş yerində olmadığı açıq-aydın görünür. Videoda yer alan otağın məhz baş həkimə aid olduğu müşahidə edilir.

Eyni görüntülərdə, otaqda səs tonunu qaldırdığı iddia edilən həkimin isə hazırda heç bir rəsmi əmr olmadan Keyfiyyətə Nəzarət şöbəsinin müdiri kimi fəaliyyət göstərdiyi bildirilən Günay Balaqadoşova olduğu iddia olunur. Qeyd edək ki, Günay Balaqadoşovanın Xaçmaz rayon YAP sədri Məhəmməd Balaqadoşun gəlini olduğu da iddialar arasındadır.

Maraqlı məqamlardan biri də odur ki, videoda Xaçmaz RMX-nin baş həkimi kimi Səyyaf Tağıyevin adı çəkilir. Lakin faktiki olaraq Səyyaf Tağıyev xəstəxananın direktorudur, baş həkim vəzifəsini isə Əhməd Əhmədov icra edir. Videodan da görünür ki, çəkiliş aparılan otaq məhz Əhməd Əhmədova məxsus iş otağıdır.

Qeyd edək ki, əmək qabiliyyətsizlik vərəqələrinin düzgün və vaxtında açılması həm vətəndaşın sosial təminatı, həm də əmək hüquqlarının qorunması baxımından mühüm əhəmiyyət daşıyır. Bu cür uyğunsuzluqlar isə birbaşa vətəndaşın maddi vəziyyətinə təsir göstərir.

Bakunews.az olaraq qarşı tərəfin — Xaçmaz Rayon Mərkəzi Xəstəxanasının rəhbərliyinin də mövqeyini dərc etməyə hazırıq.

Həmin videogörüntüləri oxucularımıza təqdim edirik.