Bakı şəhərində sentyabrın 12-də “Nemi Manor” İncəsənət Mərkəzinin təntənəli açılış mərasimi keçirilib.

Gənclərin yaradıcılıq potensialının üzə çıxarılması, sənətə və mədəniyyətə marağın artırılması məqsədi daşıyan tədbir yüksək səviyyədə təşkil olunub. Mərkəzin fəaliyyətinin həyata keçirilməsində rəhbərlər Təhminə Yusifova və Xuraman Şəms, eləcə də gənclərə dəstək göstərən sahibkar Neman Abdullayev xüsusi rol oynayıblar.

Tədbirdə müxtəlif sahələri təmsil edən nümayəndələr və sənət adamları iştirak ediblər. Onların sırasında Beynəlxalq Qalereyanın direktoru Elnurə İskəndərova, www. İlk xəbər. org jurnalının rəhbəri Xanoğlan Əhmədov, “Dünya Xəbər” saytının rəhbəri Dünya Əliyeva, APTFLOOW Tədris Mərkəzinin rəhbəri Aygün Kamil qızı və “Kut Teatrı”nın rəhbəri Səid Hüseynzadə yer alıblar.

Açılış mərasimi zəngin bədii proqramla davam edib. “Etnatopiya” ansamblının üzvləri Murad Nəbiyev və Samir Fərəcov, müğənnilər İlqar Sadıqov və Seymur Əliyev öz çıxışları ilə tədbirə xüsusi rəng qatıblar.

Xuraman Şəmsin rəhbərlik etdiyi Bakı Uşaq-Gənclər Yaradıcılıq Mərkəzində fəaliyyət göstərən Bakı Rəqs Qrupunun təqdim etdiyi rəqs nömrələri də qonaqlar tərəfindən böyük maraq və alqışlarla qarşılanıb. “Kut Teatrı”nın təqdim etdiyi maraqlı səhnə nümunələri isə tədbirə xüsusi ovqat bəxş edib.

Açılış mərasimində “Nemi Manor” İncəsənət Mərkəzinin rəhbəri Təhminə Yusifovanın qədim əşyalardan ibarət zəngin eksponat kolleksiyası qonaqlar tərəfindən böyük maraqla qarşılanıb.

Bununla yanaşı, Rəssamlar İttifaqının üzvü, rəssam-modilyer, rejissor və Bakı Uşaq-Gənclər Yaradıcılıq Mərkəzinin rəhbəri Xuraman Şəmsin müxtəlif mövzularda yaratdığı rəsm əsərləri də nümayiş olunub. Sərgidə təqdim edilən əsərlər qonaqların xüsusi marağına səbəb olub.

“Nemi Manor” İncəsənət Mərkəzi gənclərin yaradıcılıq imkanlarının üzə çıxarılması və onların sənət fəaliyyətinin dəstəklənməsi üçün yeni bir mədəni platforma kimi fəaliyyət göstərəcək. Mərkəzdə gənclərin əl işlərinin nümayişi və sərgilərin təşkili, kitab təqdimatları, fotoçəkilişlər, müxtəlif yaradıcılıq görüşləri və gənclərin asudə vaxtının səmərəli təşkili nəzərdə tutulur.

“Nemi Manor” İncəsənət Mərkəzinin yaradılması sənətə maraq göstərən gənclər üçün yeni imkanların açılması, müxtəlif yaradıcılıq sahələrinin bir araya gətirilməsi və mədəni mühitin daha da zənginləşdirilməsi baxımından əhəmiyyətli addımdır.