Azərbaycan Respublikasında 2023-cü ilin “Heydər Əliyev İli” elan edilməsi ilə bağlı Tədbirlər Planı çərçivəsində İqtisadiyyat Nazirliyinin tabeliyində İqtisadi Elmi Tədqiqat İnstitutu “İqtisadiyyatı güclü olan dövlət hər şeyə qadirdir” adlı ümumrespublika və beynəlxalq elmi və praktiki məqalə müsabiqəsi elan edir.

Müsabiqənin məqsədi Ümummilli Lider Heydər Əliyevin elmə verdiyi töhfələri əsas tutaraq, Azərbaycanın iqtisadi inkişafına həsr edilmiş elmi-tədqiqatları təşviq etmək və tanıtmaqdır.

Müsabiqədə yerli və xarici ali təhsil və elmi-tədqiqat müəssisələrinin, beyin mərkəzlərinin əməkdaşları, doktorant, magistr və bakalavrlar iştirak edə bilərlər.

Heydər Əliyevin Azərbaycan iqtisadiyyatının inkişafında müstəsna xidmətlərinə həsr edilən müsabiqənin əsas istiqamətləri aşağıdakılardır:

Qeyri-neft sektorunun inkişafı: iqtisadi fəaliyyət sahələrinin inkişafa təsirləri;

Logistika və ticarətin inkişafı, nəqliyyat dəhlizlərinin ölkənin iqtisadi inkişafına təsirləri;

Sosial və dayanıqlı inkişaf siyasətinin hədəfləri;

İşğaldan azad olunmuş ərazilərin yenidənqurma və bərpasında ölkənin iqtisadi diplomatiyasının rolu: Azərbaycanın timsalında;

Azərbaycan beynəlxalq iqtisadi münasibətlərdə;

Postpandemiyadan sonrakı iqtisadi trendlər;

Kreativ (yaradıcı) iqtisadiyyatın qloballaşmada rolu;

Rəqəmsal transformasiyanın iqtisadi inkişafda rolu;

Neft və qaz sektorunun inkişafı.

Müsabiqə qaliblərinə pul mükafatı, həmçinin, bütün iştirakçılara həvəsləndirici sertifikat təqdim edilməsi nəzərdə tutulur. 4 qalib iştirakçının seçilməsi və hər birinin 500 AZN məbləğində mükafatlandırılması planlaşdırılır.
Məqalələr 8 iyun 2023-cü il tarixinədək office@esri.gov.az elektron ünvanına göndərilməlidir.
Müsabiqənin nəticələri 19 iyun 2023-cü il tarixində elan olunacaq. Müsabiqənin yekunları ilə bağlı tədbir 3 iyul 2023-cü il tarixində keçiriləcək.
Məqalələrin yazılması, qiymətləndirilməsi şərtləri və qaydaları ilə bağlı ətraflı məlumat almaq üçün linkə keçid edə bilərsiniz.