Paytaxtda sərnişin daşıma sahəsində növbəti narahatlıq doğuran hadisə qeydə alınıb. 99 JM 353 dövlət qeydiyyat nişanlı, 119 saylı marşrut xətti üzrə fəaliyyət göstərən avtobusun sürücüsü yol hərəkəti qaydalarını kobud şəkildə pozaraq digər nəqliyyat vasitəsinə təhlükəli vəziyyət yaradıb.

Hadisə zamanı ötmə zolağında hərəkət edən avtomobil sürücüsü çətin anlar yaşayıb. Məlumata görə, qarşı tərəfin irad bildirməsinə baxmayaraq avtobus sürücüsü özünü haqlı hesab edib və davranışını dəyişməyib. Bu isə həm sürücülər, həm də sərnişinlər üçün ciddi risk yaradıb.

Əldə edilən məlumatlara əsasən, sözügedən avtobusun “Xaliq Faiqoğlu” MMC-yə məxsus olduğu bildirilir. Qeyd edək ki, şirkətin balansında olan, xüsusilə Xırdalan şəhəri istiqamətində fəaliyyət göstərən marşrut xətləri ilə bağlı vətəndaş şikayətləri son dövrlər daha da artıb.

Sərnişinlər və digər yol hərəkəti iştirakçıları məsul qurumları bu kimi hallara qarşı ciddi nəzarət tədbirləri görməyə çağırır. Təhlükəsizlik qaydalarının pozulması isə istənilən an daha ağır nəticələrə səbəb ola bilər.