Naxçıvanda baş verən ağır olay bir ailəni gözü yaşlı qoyub. Əslən Şərur rayonunun Danyeri kəndindən olan Cəfərov Rafiq Salman oğlu 18 oktyabr 2025-ci il tarixində həmin kənddə keçirilən toy mərasiminə qatılıb.

Məclisdən çıxarkən bir neçə şəxsin arasında baş verən mübahisəni görən Rafiq Cəfərov, ahıl yaşına baxmayaraq, səsini sakit saxlayaraq gənclərə “başqasının evinin qarşısında nalayiq ifadələr işlətməyin, söhbətinizi kənarda edin” deyib və hadisə yerindən uzaqlaşmağa çalışıb.

Lakin şahidlərin bildirdiyinə görə, həmin şəxslərdən – iki qardaş, Seymur və Qəşəm – Rafiq Cəfərovun arxasınca gedərək onu amansızcasına döyüblər. Nəticədə Rafiq Cəfərov ağır xəsarətlər alıb və hal-hazırda komada olduğu bildirilir.

Ailə üzvlərinin sözlərinə görə, Rafiq Cəfərov toya gedərkən cibində 8 min manat məbləğində pul aparıb. Lakin hadisədən sonra onun üzərindəki həmin pulun yoxa çıxması diqqət çəkir. Yaxınları hesab edir ki, Rafiq Cəfərovu döyən şəxslər həm də cibindəki pulu götürüb. İlkin vəziyyət bu ehtimalı tamamilə gücləndirir.

Hadisə ilə bağlı hər iki qardaş Şərur Rayon Polis Şöbəsinə aparılsa da, qardaşlardan biri dərhal buraxılıb, digəri isə hazırda saxlanılsa da, sabah onun da sərbəst buraxılacağı bildirilir.

Rafiq Cəfərovun ailəsi bu vəziyyətə kəskin etiraz edir və günahsız bir insanı ağır vəziyyətə salan, eyni zamanda maddi dəyərlərinə toxunan şəxslərin azadlığa buraxılmasını ədalətsizlik hesab edir. Ailə Daxili İşlər Naziri Vilayət Eyvazovdan hadisəni şəxsi nəzarətinə götürməyi və günahkarların qanun qarşısında cavab verməsini xahiş edir.


Mirkənan Seyidov
Bakunews.az