Masallıda qazi intiharı: Ailədaxili şantaj faciəyə səbəb olub?
Masallı rayonunda qazi Fətullayev Pərvin Fəxrəddin oğlu intihar edib. Hadisədən əvvəl Pərvin Fətullayev sosial şəbəkələrdə video paylaşaraq, həyatına son qoyacağını açıqlayıb. O, videoda intihar qərarının səbəblərini də ictimaiyyətə bəyan edib.
Mərhum qazinin qardaşı Fətullayev Sərxan Fəxrəddin oğlu Bakunews.az-a açıqlamasında bildirib ki, qardaşının intiharına keçmiş həyat yoldaşı Məcidzadə Aytən İldırım qızı və onun ailəsinin təzyiqləri səbəb olub:
“Aytən Məcidzadə qardaşımı şəxsi fotoları ilə şantaj edirdi. O, evə qayıtmayacağı halda qardaşımın gizli şəkildə çəkilmiş fotolarını ictimailəşdirmək hədəsi ilə onu daim təzyiq altında saxlayırdı. Pərvin bu təzyiqlərə dözmədi və həyatına son qoydu.”
Sərxan Fətullayevin sözlərinə görə, mərhum Pərvin Fətullayev birgə nikah dövründə həyat yoldaşının başqa bir kişi ilə yazışmalarını aşkar edib və bu səbəbdən onu evdən uzaqlaşdırıb. Lakin qadının ailəsi, xüsusilə atası İldırım Məcidzadə, qaziyə qarşı hədə-qorxu kampaniyasına başlayıb:
“Aytənin atası İldırım qardaşıma deyib ki, əgər qızımı geri qaytarmasan, fotolarını yayacağam. Kənddə hörmətdən salacağam. Qardaşım isə dözə bilmədi, çünki artıq onun şəxsiyyəti və qüruru ilə oynayırdılar.”
Mərhumun ailəsi bildirir ki, məsələ ilə bağlı Masallı rayon prokurorluğuna dəfələrlə müraciət edilsə də, araşdırma aparılmayıb.
“Prokuror Fariz Musayev bizə dedi ki, qardaşın gedib özünü asıb, burada cinayət işi yoxdur. Bu cavab bizi dərindən sarsıtdı. Qardaşımın ölümündə açıq şəkildə hədə, təzyiq və psixoloji zorakılıq var. Lakin hüquq-mühafizə orqanları hadisəni adi intihar kimi qələmə verir,” — deyə mərhumun qardaşı qeyd edib.
Sərxan Fətullayev dövlət rəhbərliyinə müraciət edərək, qardaşının ölümünün ədalətli şəkildə araşdırılmasını xahiş edir:
“Qardaşım bu Vətən uğrunda sağlamlığını itirib. Biz sadəcə ədalət istəyirik. Azərbaycan Respublikasının Prezidenti cənab İlham Əliyevdən, Baş Prokuror Kamran Əliyevdən xahiş edirik ki, bu hadisə ilə bağlı əsaslı araşdırma aparılsın və günahkarlar qanun qarşısında cavab versinlər.”
Qeyd edək ki, qazi Pərvin Fətullayevin ölümü ilə bağlı Masallı rayonunda geniş rezonans yaranıb. Yerli sakinlər və ictimai fəallar bu məsələnin şəffaf araşdırılmasını tələb edirlər.
Qazi Pərvin Fətullayevin intihar öncəsi video paylaşımını təqdim edirik:
Şikayət və təkliflər üçün qaynar xətt:
Əlaqə whatsapp:+994 70 402 02 85
BakuNews.az
Əlaqə whatsapp:+994 70 402 02 85
BakuNews.az
