2003 – ci il prezident seçkilərində qeydə alınmış namizədlər kimi iştirak edən İsa Qəmbər və Etibar Məmmədov arasında danışıqlara dair mediada, o cümlədən sosial şəbəkələrdə müzakirələr gedir.
Tərəflər bir-birilərinin ünvanına ittihamlar səsləndirib.

“Cebheinfo.az” xəbər verir ki, Azərbaycan Xalq Partiyasnının sabiq sədri Pənah Hüseyn də məsələylə bağlı fikirlərini bölüşüb.

“Bir çox dostlar mənə müraciət edərək bu məsələyə aydınlıq gətiməyi xahiş etdilər. lakin mən mövzunu aktual saymayaraq, üstəlik zərərli olduğu qənaətimə görə gələcəkdə, daha sakit ortamda, imkan olsa toxunaram deyə düşünüb qarışmadım. Lakin spekulyasiyalar davam edir.

Arada mənim də adım çəkilir. Odur ki, təfsilatlı təsvir və izahı gələcəyə buraxıb bu günkü mübahisə, çəkişmə və diskussiyalara əsasən son qoya biləcək bir materialı dərc etməyi faydalı saydım”.

Pənah Hüseyn sosial şəbəkə hesabında maraqlı material yayıb:

“Bu material İsa Qəmbər və Etibar Məmədov arasında seçki ilə bağlı razılaşma sənədi layihəsinin müəlliflərindən biri, o vaxt AMİP rəhbərliyində və Etibar Məmmədovun komandasında əsas fiqurlardan olan tanınmış hüquqşünas, prezidentliyə AXCP- AMİP koalisiyasının vahid namizədi E. Məmmədovun vəkili Fuad Ağayevin 10 oktyabr 2003- cü il tarixində keçirdiyi mətbuat konfransındakı açıqlamalarıdır. Material “Azadlq” qəzetinin 11 oktyabr 2003- cü il tarixli sayında dərc edilib".

Materialda bildirilir ki, üç müxalifət lideri – Əli Kərimli, Etibar Məmmədov və İsa Qəmbərin keçirdikləri görüşün müəyyən mərhələsində iştirakçı olmuş F. Ağayev danışıqların gedişi barədə jurnalistləri məlumatlandırıb:

Bildirib ki, liderlərin görüşündəilkin anlaşma əldə olunduqdan sonra Qulamhüseyn Əlibəyli və Fuad Ağayev oraya dəvət olunublar:

“Biz razılaşdırılmış prinsiplərə uyğun saziş layihəsi hazırlamalı idik. Bu prinsiplər aşağıdakılardan ibarət idi. Yaxın dövr üçün Koalisiya Şurası yaradılır. Şuraya Əli Kərimli, Etibar Məmmədov və İsa Qəmbər daxil olur. Qurumun sədri Etibar Məmmədov seçilir. Başqa liderlərin də bu Şurada təmsil olunması məqsədəuyğun sayılır. Koalisiyanın vahid namizədi kimi İsa Qəmbər çıxış edir.

Seçkidə qələbə çaldıqdan sonra koalisiyalı hakimiyyət formalaşır ki, prezident İsa Qəmbər olduğu təqdirdə Etibar Məmmədov baş nazir olur. Bu koalisiyadakı nazirlərin, dövlət komitə sədrlərinin mərkəzi icra hakimiyyəti orqanlarına təyinatə konsensus yolu ilə Koalisiya Şurasında müəyyənləşir.

Yalnız bundan sonra baş nazir müvafiq təqdimatla prezidentə müraciət edir və o öz fərmanını verir. Prezident seçkilərindən 6 ay sonra yeni Konstitusiya layihəsi referenduma çıxarılır.

Həmin layihədə fövqəladə səlahiyyətli prezidentli respublikadan parlamentli respublikaya keçid nəzərdə tutulur. Burada da Türkiyə modeli əsas götürülür. Konstitusiya islahatından 6 ay sonra ölkədə parlament seçkiləri keçirilir”.

F. Ağayevin sözlərinə görə liderlərin razılaşdıqları prinsiplər bunlardan ibarət olub. İsa Qəmbər layihəni hazırladıqdan sonra bildirib ki, sənəd hazırlandıqdan sonra ona çatdırılsın:

“İsa bəy dedi ki, layihəni öz partiyasında müzakirə edib onların dəstəyini almağa çalışacaq. Biz prinsipləri saziş layihəsi şəklinə saldıqdan sonra liderlərə, o cümlədən İsa bəyə çatdırdıq”.

Sonradan məlum oldu ki, liderlərin görüşündən sonra isa Qəmbərin Rəsul Quliyevlə söhbəti olub və anlaşma əldə ediblər.

P.Hüseyn bildirib ki, bu məsələyə dair yenə 2003- cü il tarixində Musavat, ADP və “Bizim Azərbaycan” seçki blokuna daxil olan digər şəxslər tərəfindən də çoxsaylı açıqlamalar, şərhlər, izahlar var.