Hər bir Azərbaycan insanı vergiləri sayəsində formalaşan büdcə vəsaitinin necə xərcləndiyini bilməlidir. Bu onun haqqı və hüququdur...

Biləsuvar Rayon İcra Hakimiyyəti “Baku Buılding” Məhdud Məsuliyyətli Cəmiyyəti (MMC) ilə daha bir müqavilə imzalayıb. Bu dəfə Ulu öndər Heydər Əliyevin abidəsinin postamentinin, abidəətrafı döşəmələrin və pilləkənlərin təmiri ilə bağlı. 12.09.2025-ci il tarixdə dövlət satınalmalarının vahid internet portalında yerləşdirilmiş məlumata görə tərəflər arasında 257.541,35 AZN məbləğində müqavilə bağlanıb...

Xatırladaq ki, “Baku Buılding” MMC Biləsuvar Rayon İcra Hakimiyyəti üçün heç də yad şirkət deyil. Bundan əvvəl də, tərəflər arasında əməkdaşlıq olub. Budəfəki əməkdaşlıq isə müəyyən faktorlarla fərqlənir...

Niyə məhz “Baku Buılding” MMC?!

Biləsuvarlı oxucularımızın Yenixeber.org-a ötürdüyü məlumata görə, Biləsuvar Rayon İcra Hakimiyyəti ilə “Baku Buılding” MMC arasındakı bu əməkdaşlıq hansısa zərurətlərin məhsuludur...Məlumata görə bu müqavilə üzrə satınalma proseduru dövlət satınalmalarının vahid internet portalında keçirilməmişdir (elektron satınalma deyil)(?) Başqa sözlə Biləsuvar Rayon İcra Hakimiyyəti yuxarıda qeyd etdiyimiz iş üzrə tender elan etmədən, bir mənbədən olmaqla “Baku Buılding” MMC ilə müqavilə bağlayıb.

Bu ilginc faktor olmaqla bərabər, məlum qanunla qadağan da deyil. Amma,...müvafiq əsaslandırmalarla!

Bu arada qeyd edək ki, Azərbaycan Respublikasının “Dövlət satınalmaları haqqında” Qanunun 15.1 maddəsində göstərilir ki, məxfi məlumatlarla əlaqəli satınalmalar istisna olmaqla, bütün dövlət satınalmaları yalnız portal vasitəsilə həyata keçirilir.

Eyni zamanda Qanunun 49-cu maddəsində qeyd olunur ki, bir mənbədən satınalma metodu aşağıdakı hallarda tətbiq olunur: satınalma predmeti yalnız hər hansı konkret təchizatçıda olduqda; satınalma predmetinin əvəzedicisi və alternativi olmadıqda; satınalma predmetinə təcili tələbat yarandıqda; təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə; satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.

Göründüyü kimi, "Dövlət satınalmaları haqqında qanu"nda bir mənbədən satınalamaları zəruri edən şərtlər aydın şəkildə sadalanır...

İndi isə sual olunur: Biləsuvar rayonunda Ulu öndər Heydər Əliyevin abidəsinin postamentinin, abidəətrafı döşəmələrin və pilləkənlərin təmiri ilə bağlı müvafiq satınalma müsabiqəsi etmədən, birbaşa “Baku Buılding” MMC ilə müqavilə bağlamaq hansı səbəblərdən qaynaqlanır???

Bu prosesdə dövlətin pulunu xərcləyən tərəf kimi, Biləsuvar Rayon İcra Hakimiyyəti tərəfdən hansı məsul şəxslər iştirak edib, rəhbərlik kimə məxsus olub?

“Baku Buılding” MMC-nə niyə üstünlük verilib? Və s...

Bu da bir YENİLİK...

Biz Yenixeber.org olaraq, bu və digər suallarımıza cavab almaq istəyi ilə 15.09.2025-cil tarixdə Biləsuvar Rayon İcra Hakimiyyətinin başçısı cənab Faiq Qürbətova online rəsmi sorğu ünvanladıq. Və sörğumuza “cavab” aldıq. “Cavab” sözünü səbəbsiz dırnaqda yazmadıq. Qarşı tərəf suallarımızı cavablandırmağı “unudub” da, redaksiyamızla bağlı bizə sorğu göndərdi(?) 2-3 sualdan ibarət: bir az mənasız, bir az anlaşılmaz, bir az da təhdid qoxulu...

Bu təkcə bizim üçün yox, bəlkə də, mətbuat tarixində bir ilk oldu. İlk dəfə idi ki, belə bir “cavab”ı eşidib, görürdük. Olsun, bu da bir yenilikdir... Hansı səbəblərdən qaynaqlanması məlum olmayan, YENİLİK!

Bəlkə də, hörmətli qarşı tərəf üçün suallarımız gözlənilməz olub. Ki, bu səbəbdən də cavab yazmağa söz tapılmayıb...Bəlkə də, başları daha da ciddi işlərə qarışıb və bu səbəbdən də cavab yazmağa zaman ayırmağı uyğun bilməyiblər...Bəlkə də,...

Nə isə ümid edək ki, qarşıdakı günlərdə sorğumuz cavablandırılacaq və biz də daha detallı və geniş yazı hazırlaya biləcəyik.

***

Biləsuvar rayonunda Ulu Öndər Heydər Əliyevin anadan olmasının 98-ci ildönümü qeyd olundu

Yeri gəlmişkən qeyd edək ki, Biləsuvar rayon İcra Hakimiyyətinin tenderləri ilə bağlı idiyədək də, mediada şikayətlər yer alıb: Biləsuvar rayon sakini Sədrəddin Məmmədov 2021, 2022 və 2023-cü illər üzrə Biləsuvar rayon İcra Hakimiyyətində keçirilən tenderlərdə "Dövlət satınalmaları haqqında Qanunu"na əməl edilmədiyini iddia edib.
O bildirib ki,Tender komissiyası tenderlərdə iştirak edən müəssisələrin ixtisas uyğunluğunu əvvəlcədən müəyyənləşdirimir. Komissiya bu işə məhəl qoymur:

"Nəticədə keçən 3 ildə rayonun ərazisində görülən işlərdə xüsusən küçələrin asfaltlaşmasında və abadlaşdırma işlərində qalib podratçının maddi-texniki bazası olmadığı halda, yəni asfaltlaşmaya aid asfalt zavodu, asfalt basmaq üçün texnikası, əmək müqaviləsi bağlanılmış təcrübəli işçi qüvvəsi və səriştəsi olmadığı halda özəl müəssisələr əsassız qalib çıxarılmış və onlarla müqavilə bağlanılmışdır. Buna nümunə olaraq 2022-ci ildə ilin sonunda qalib çıxarılan müəssisə 2023-cü ilin yanvar fevral aylarında küçələrə asfalt qoymuş, nəticədə heç üstündən bir həftə keçməmiş qoyulan asfalt dağılıb məhv olmuşdur. Olunan şikayət əsasında görulən işlər mərkəzi orqanlar tərəfindən yoxlanılmış asfaltın yenidən qoyulmasını göstəriş versələr də bu işə məhəl qoyulmamışdır. Axı nə səbəbə Biləsuvar Rayon İcra Hakimiyyəti görüləcək işlər üçün tenderi ilin ortalarında yox, ilin axırında tələm-tələsik keçirir?"

***

Korrupsiya və rüşvətxorluğa qarşı mübarizə siyasəti

“BAKU BUILDING” MMC haqqında: Google üzərindən apardığımız araşdırmalarla məlum olur ki, bu şirkətin sahibi Azərbaycanda “tender” kralı kimi tanınan iş adamı Ramazan Mirzəyevin qardaşı Əli Mirzəyevdir. MMC-nin 2019-cu ilin yanvarında yaradılmasının özü çox mətləblərdən xəbər verir. Belə ki, elektron mediada 2018-ci ildə Mirzəyev qardaşları arasında pay bölgüsü üstündə mübahisələrin yaranması barədə xəbərlər yayılıb. Məhz bundan sonra Əli Mirzəyev öz şirkətini yaratmaq qərarına gəlib. Yaratdığı şirkət də qısa zamanda paytaxt daxil, ölkənin bir çox rayonlarında iri həcmli tenderlərin qalibi olub və olmaqda davam edir.

Və son əvəzi…

Cənab Faiq Qürbətova xatırlatmaqda fayda var ki, hər bir Azərbaycan insanı vergiləri sayəsində formalaşan büdcə vəsaitinin necə xərcləndiyini bilməlidir. Bu onun haqqı və hüququdur...

Dövlət büdcəsi hansısa yardım fondu deyil ki, ölkə ictimaiyyəti və aidiyyatı dövlət orqanları tərəfindən bir o qədər də, maraqlı görünməsin... Dövlətin pulu heç bir məmura dədə-babasından qalmış əmanət deyil ki, könülü istədiyi kimi xərcləsin!

Təəssüf ki, hələ də, bəzi səlahiyyət sahibləri medianın sorğusuna cavab verməyin vəzifə borclarından biri olduğunu ya bilmir, ya da bilmək istəmirlər. Həm də onu bilmək istəmirlər ki, heç bir vəzifə sahibi bir gün “qapısının döyülmədən açılacağından” sığortalanmayıb. Faiq müəllimin indi oturduğu kabinetin qapısı vaxtı ilə döyülmədən açıldığı kimi...(Hərçənd ki, biz heç kimə bunu arzulamırıq. Red.)

(Yenixeber.org)