Bu gün İmişli rayonunda təməli qoyulmuş pivəlik arpa emalı zavodunda İqtisadiyyat Nazirliyinə məxsus “Azərbaycan İnvestisiya Şirkəti” ASC 24%, “Azərşəkər” MMC və “Azərsun Holding” MMC isə hər biri 38% paya malik olacaq.
“Report” xəbər verir ki, bunu “Azərşəkər”in İdarə Heyətinin sədri Anar Mehdiyev bildirib.

Onun sözlərinə görə, İsveçrə texnologiyası ilə inşa olunacaq zavod Cənubi Qafqazda ilk belə müəssissə olacaq və dünya standartlarına uyğun məhsul istehsal edəcək.

A.Mehdiyev ixracla bağlı məsələyə də toxunub: “Regionda ən böyük istehlakçı Gürcüstandır. Bu ölkənin pivəyə olan illik tələbatı 25 milyon tondur. Biz Gürcüstan bazarını hədəfləmişik. Bununla yanaşı, Mərkəzi Asiya və Yaxın Şərq ölkələrində də böyük bazar var. Zavod fəaliyyətə başlamamış bizə İraq və Əfqanıstan kimi ölkələrdən də müraciətlər var. Zavod fəaliyyətə başlayandan sonra bütün ixrac imkanlarını nəzərdən keçirəcəyik. Amma yerli bazarın tələbatının ödənilməsi əsas prioritetdir. Zavodun fəaliyyətə başlaması ilə yerli pivənin maya dəyərində bəzi optimallaşdırmalar ola bilər”.