"İki gün öncə KİV-lər Qusar şəhərində baş verən yol-nəqliyyat hadisəsi zamanı 6 yaşlı uşağın ölümü barədə məlumat yaydılar. Xəbərdə bildirilirdi ki, hadisə Qusar şəhərindəki Əmiraslanov küçəsində baş verib. “JEEP WRANGLER” markalı avtomobilin sürücüsü yolun sağ tərəfində hərəkətdə olan velosipedçini vurub. 6 yaşlı Qusar rayon sakini aldığı xəsarətlərdən yerindəcə vəfat edib..." "DİA-AZ" xəbər verir ki, bu barədə jurnalist Müqəddəs Mehdiyev açıqlamasında qeyd edib.

O daha sonra bildirir: "Maraqlısı budur ki, KİV-lərdə (shimal.news istisna olmaqla) 6 yaşlı uşağın adı və soyadı dərc olunmayıb. Sürücünün kimliyi isə indiyədək naməlum olaraq qalır. Baş vermiş hadisə ilə əlaqədar “Şimal xəbərləri”nə çoxsaylı zənglər daxil olub. Sakinlər nə üçün xəbərlərdə hadisəni törədən şəxsin adının, avtomobilinin dövlət nömrə nişanının qeyd edilmədiyi, vəfat edən uşağın ad və soyadının çəkilməməsi ilə maraqlanırlar. Onlar haqlıdırlar. Belə hallarda insanlarda müəyyən şübhələr yaranır.

“Şimal xəbərləri”nin araşdırmasına görə, qəza həqiqətən də Qusar şəhərinin Əmiraslanov küçəsində baş verib. Yol-nəqliyyat hadisəsi nəticəsində dünyasını dəyişən Möhürov Səfər Ceyhun oğludur. Mərhum dəfn edilib (Allah rəhmət etsin). O ki qaldı sürücünün kimliyinə, bu barədə “Şimal xəbərləri”nə ziddiyətli məlumatlar daxil olub. Mənbələrdən biri deyir ki, uşağı qara rəngli, 38-AA-138 dövlət nömrə nişanlı “JEEP WRANGLER” markalı avtomobil vurub. İddialara görə, sükan arxasında Qusar sakini Anjela Məmmədova İlham qızı olub. Başqa bir iddiaya görə isə, sükan arxasında azyaşlı əyləşib. Qəza isə maşın arxa istiqamətə hərəkət edərkən baş verib. Bir daha qeyd edirik ki, bunlar “Şimal xəbərləri”nə daxil olan iddialardır və araşdırma davam edir. Qarşı tərəflərin mövqeyini dərc etməyə hazırıq. Qusar rayon prokuroru cənab Ceyhun Mirzəyevdən xahiş edirik ki, baş vermiş yol-nəqliyyat hadisəsinin ictimaiyyət arasında doğurduğu rezonansı nəzərə alaraq, istintaqı şəxsi nəzarətinə götürsün..."