Vüqar Qurbanov dövründə həyata keçirilən kadr siyasəti ilə bağlı narazılıqlar yenidən gündəmə gəlib. Cəmiyyətdə səslənən fikirlərə görə, bəzi təyinatlarda peşəkarlıq meyarlarının kifayət qədər nəzərə alınmaması səhiyyə idarəçiliyinə olan etimadı sarsıdır.

Xüsusilə müzakirə olunan məsələlərdən biri də Bəhmən Kərimovun Respublika Təcili və Təxirəsalınmaz Tibbi Yardım Mərkəzində inzibati məsələlər üzrə direktor müavini və nəqliyyat sektorunun kuratoru vəzifəsinə təyin olunmasıdır.

Mediada yer alan iddialara görə, sözügedən şəxsin nəqliyyat və texniki sahə üzrə ixtisas təhsili yoxdur. Bildirilir ki, onun əvvəlki peşə fəaliyyəti daha çox bank sektorunu əhatə edib və bu təcrübənin təcili tibbi nəqliyyat sisteminin idarə olunması ilə birbaşa əlaqəsi olmadığı qeyd olunur.

Ekspertlər vurğulayırlar ki, təcili tibbi yardım sistemində nəqliyyatın düzgün idarə olunması həyati əhəmiyyət daşıyır. Avtomobillərin texniki vəziyyəti, briqadaların operativ koordinasiyası və düzgün qərarvermə mexanizmi birbaşa insan həyatına təsir edən amillərdir. Bu səbəbdən sahə üzrə ixtisaslaşmış kadrların seçilməsi xüsusi önəm kəsb edir.

Tənqidçilərin fikrincə, uyğun sahə təhsili və praktiki təcrübəsi olmayan şəxslərin belə həssas vəzifələrə təyin olunması xidmətin keyfiyyətinə mənfi təsir göstərə bilər. Bu isə ümumilikdə səhiyyə sisteminə ictimai etimadın azalmasına səbəb olur.
Mövzu ilə bağlı rəsmi qurumların mövqeyi hələlik açıqlanmayıb.

Qarşı tərəfin cavab haqqını tanıyırıq və məsələ ilə bağlı rəsmi açıqlamaya açığıq.